پاکپتن: خاور مانیکا کے بیٹے موسیٰ مانیکا نے مبینہ طور پر اپنے ذاتی ملازم پر فائرنگ کر کے اُسے زخمی کر دیا، پولیس نے بروقت کارروائی کرتے ہوئے ملزم کو اسلحے سمیت گرفتار کر لیا۔
تفصیلات کے مطابق واقعہ پیر غنی کوٹھی میں پیش آیا، جہاں موسیٰ مانیکا نے مبینہ طور پر کام میں غفلت برتنے پر اپنے ملازم علی بہادر پر فائرنگ کی۔ گولیاں لگنے سے علی بہادر زخمی ہو گیا، جسے فوری طور پر قریبی اسپتال منتقل کیا گیا۔ ڈاکٹروں کے مطابق زخمی کی حالت خطرے سے باہر ہے۔
ڈسٹرکٹ پولیس آفیسر (ڈی پی او) پاکپتن، جاوید اقبال چدھڑ نے واقعے کی تصدیق کرتے ہوئے بتایا کہ پولیس نے فوری ایکشن لیتے ہوئے موسیٰ مانیکا کو گرفتار کر لیا ہے اور اسلحہ بھی برآمد کر لیا گیا ہے۔ ان کے مطابق واقعے کی مکمل تفتیش جاری ہے اور تمام پہلوؤں کا باریک بینی سے جائزہ لیا جا رہا ہے تاکہ اصل حقائق عوام کے سامنے لائے جا سکیں۔
پولیس کے مطابق زخمی ملازم کا بیان ریکارڈ کیا جا رہا ہے اور مقدمہ درج ہونے کے بعد مزید قانونی کارروائی عمل میں لائی جائے گی۔
واقعے کے بعد شہری حلقوں میں شدید تشویش کی لہر دوڑ گئی ہے اور عوام کی جانب سے انصاف کی فراہمی کا مطالبہ زور پکڑ گیا ہے۔
یاد رہے کہ خاور مانیکا کا تعلق پنجاب کے ایک بااثر سیاسی و روحانی خاندان سے ہے اور ان کا نام ماضی میں بھی مختلف سیاسی معاملات کے حوالے سے خبروں میں آتا رہا ہے۔ بیٹے موسیٰ مانیکا کے اس اقدام نے ایک بار پھر مانیکا خاندان کو میڈیا کی توجہ کا مرکز بنا دیا ہے۔
