ایرانی صحافی عبداللہ گنجی نے دعویٰ کیا کہ نیتن یاہو نے اسرائیل-ایران جنگ کے دوران جنّات اور جادوئی طاقتوں سے مدد لی، موساد کا طنزیہ ردعمل بھی سامنے آ گیا۔
تہران، ایران کے معروف صحافی اور پاسدارانِ انقلاب کے ترجمان اخبار "جوان” کے سابق ایڈیٹر عبداللہ گنجی نے ایک حیران کن دعویٰ کرتے ہوئے کہا ہے کہ حالیہ اسرائیل-ایران جنگ کے دوران اسرائیلی وزیراعظم بنیامین نیتن یاہو نے مبینہ طور پر جادو، جنّات اور مافوق الفطرت ارواح کی مدد حاصل کرنے کی کوشش کی۔ ان کا کہنا ہے کہ یہ سب اسرائیل کی خفیہ جنگی حکمتِ عملی کا ایک حصہ ہو سکتا ہے۔
عبداللہ گنجی نے سوشل میڈیا پلیٹ فارم "ایکس” (سابقہ ٹوئٹر) پر پوسٹ کرتے ہوئے کہا کہ جنگ کے دنوں میں تہران کی گلیوں اور سڑکوں پر یہودی علامات والے تعویذ، عجیب و غریب کاغذی ٹکڑے اور مشتبہ اشیاء ملی ہیں، جنہیں ممکنہ طور پر روحانی حملوں یا جادوئی اثرات کے لیے استعمال کیا گیا۔
انہوں نے یہ بھی دعویٰ کیا کہ غزہ جنگ کے ابتدائی ایّام میں ایسی رپورٹس بھی لیک ہوئیں جن کے مطابق بنیامین نیتن یاہو نے بعض جادوئی ماہرین اور عملیات کرنے والے افراد سے ملاقاتیں کی تھیں، جس کا مقصد جنگ میں روحانی برتری حاصل کرنا تھا۔
ایرانی صحافی کے اس بیان پر اسرائیلی انٹیلیجنس ایجنسی "موساد” کے فارسی اکاؤنٹ نے طنزیہ ردعمل دیتے ہوئے کہا: "منشیات کا استعمال اور جنوں سے باتیں کرنا کسی ملک کے سربراہ کو زیب نہیں دیتا۔”
اس کے بعد اقوامِ متحدہ میں اسرائیلی نمائندے ولید گدبان نے بھی اس معاملے پر تبصرہ کرتے ہوئے موساد کی پوسٹ کو ری شیئر کیا اور لکھا: "جن، بھوت تو ہر جگہ موجود ہیں، بس نظر آنے کی دیر ہے۔”
یاد رہے کہ اسرائیل اور ایران کے درمیان حالیہ کشیدگی نے نہ صرف عسکری محاذ پر بلکہ میڈیا اور سوشل میڈیا پر بھی ایک نئی جنگ کی شکل اختیار کر لی ہے، جہاں دونوں فریقین ایک دوسرے پر غیر روایتی الزامات عائد کر رہے ہیں۔ یہ بیان بھی اسی میڈیا وار کا ایک نیا زاویہ قرار دیا جا رہا ہے۔
