ساہیوال میں افسوسناک واقعہ، ماں نے دو کمسن بچوں سمیت ریلوے ٹریک پر جان دے دی، تحقیقات جاری
ساہیوال میں ایک دل دہلا دینے والا واقعہ پیش آیا ہے، جہاں ایک خاتون نے اپنے دو کمسن بچوں سمیت ٹرین کے نیچے آ کر خودکشی کر لی۔ یہ افسوسناک واقعہ ریلوے پھاٹک کے قریب پیش آیا، جس کے بعد علاقے میں سوگ کی فضا چھا گئی۔
ریسکیو 1122 کے حکام کے مطابق اطلاع ملتے ہی امدادی ٹیمیں فوری طور پر جائے وقوعہ پر پہنچ گئیں اور ماں اور دونوں بچوں کی لاشیں ٹیچنگ اسپتال ساہیوال منتقل کر دی گئیں۔
پولیس کے مطابق واقعے کی وجوہات جاننے کی کوشش کی جا رہی ہے اور خاتون اور بچوں کی شناخت کے لیے قریبی علاقوں میں اعلانات بھی کیے جا رہے ہیں۔ رشتہ داروں کی تلاش جاری ہے، جبکہ پولیس حکام نے معاملے کی ہر پہلو سے تفتیش شروع کر دی ہے تاکہ اس المناک واقعے کے پیچھے اصل محرکات سامنے لائے جا سکیں۔
مقامی افراد نے واقعے پر گہرے دکھ اور افسوس کا اظہار کیا ہے، جبکہ سوشل میڈیا پر بھی اس واقعے نے عوامی غم و غصے اور ہمدردی کو جنم دیا ہے، اور معاشرتی دباؤ اور ذہنی صحت جیسے مسائل پر دوبارہ توجہ دینے کی ضرورت پر زور دیا جا رہا ہے۔
یاد رہے کہ پاکستان میں حالیہ برسوں میں معاشی بدحالی، گھریلو تنازعات اور نفسیاتی مسائل کی وجہ سے اس قسم کے واقعات میں اضافہ ہوا ہے۔ ماہرینِ نفسیات اس بات پر زور دیتے ہیں کہ عوام کو ذہنی صحت کی سہولیات تک رسائی اور جذباتی مدد فراہم کرنا ریاستی ذمہ داری ہے۔
