لارڈز ٹیسٹ میں بمراہ کی شاندار کارکردگی کے باوجود خاموش جشن نے مداحوں کو حیران کر دیا، کیا وہ ٹیسٹ کرکٹ چھوڑنے کا اشارہ دے رہے ہیں؟
لندن، بھارتی فاسٹ بولر جسپریت بمراہ نے لارڈز کے تاریخی میدان پر انگلینڈ کے خلاف شاندار کارکردگی دکھاتے ہوئے 74 رنز کے عوض پانچ وکٹیں حاصل کیں، تاہم ان کی اس کامیابی سے زیادہ توجہ ان کے "خاموش جشن” نے حاصل کی، جس نے کرکٹ شائقین اور ماہرین کو حیرت میں ڈال دیا کہ آیا بمراہ ٹیسٹ کرکٹ سے ریٹائرمنٹ کا عندیہ دے رہے ہیں۔
لارڈز ٹیسٹ کے دوسرے روز بمراہ نے انگلینڈ کے مڈل آرڈر کو تہس نہس کرتے ہوئے بھارت کو میچ میں دوبارہ برتری دلائی اور پہلی بار اپنا نام آنر بورڈ پر درج کروایا۔ یہ ان کے ٹیسٹ کیریئر کی 15ویں پانچ وکٹیں تھیں، اور اس کے ساتھ ہی وہ بیرونِ ملک سب سے زیادہ پانچ وکٹیں لینے والے بھارتی بولرز میں لیجنڈری کپل دیو کو بھی پیچھے چھوڑ گئے۔
تاہم، جب بمراہ نے پانچویں وکٹ حاصل کی تو ان کا ردِعمل غیر معمولی طور پر پرسکون تھا۔ نہ وہ دوڑے، نہ ہاتھ اٹھائے، نہ چہرے پر مسکراہٹ۔ بس خاموشی سے نشان تک واپس چل دیے۔ سوشل میڈیا پر یہ منظر فوراً موضوعِ بحث بن گیا، اور شائقین نے قیاس آرائیاں شروع کر دیں کہ شاید بمراہ اب ٹیسٹ کرکٹ کو خیرباد کہنے کی سوچ رہے ہیں۔
پریس کانفرنس میں جب بمراہ سے اس خاموش جشن کی وجہ پوچھی گئی تو انہوں نے سادگی سے جواب دیا: "میں تھک گیا تھا، لمبے اسپیل کے بعد توانائی کم ہو گئی تھی۔ اب میں 21 سال کا نہیں رہا کہ وکٹ پر اچھلتا پھروں۔ میں خوش تھا کہ ٹیم کے لیے کارکردگی دی، بس اگلی گیند کی تیاری کر رہا تھا۔”
اگرچہ بمراہ کے بیان نے فی الحال ریٹائرمنٹ کی خبروں کی تصدیق نہیں کی، مگر ان کے اندازِ گفتگو سے اندازہ ہوتا ہے کہ طویل فارمیٹ اب ان کے جسم پر بوجھ بن چکا ہے۔ کرکٹ تجزیہ کاروں کا ماننا ہے کہ بمراہ کے لیے ٹیسٹ کرکٹ کا تسلسل برقرار رکھنا مشکل ہوتا جا رہا ہے، اور ممکن ہے کہ وہ محدود اوورز کے فارمیٹ پر توجہ مرکوز کرنے کا فیصلہ جلد کریں۔
بمراہ کی شاندار فارم اس وقت بھارت کے لیے بڑی نعمت ثابت ہو رہی ہے۔ انگلینڈ کے خلاف اس سیریز میں وہ لگاتار دو ٹیسٹ میں پانچ وکٹیں لے چکے ہیں۔ لیڈز میں زبردست کارکردگی کے بعد ایجبسٹن میں آرام کیا اور اب اینڈرسن-ٹنڈولکر ٹرافی کے تیسرے ٹیسٹ میں زبردست واپسی کرتے ہوئے جو روٹ سمیت انگلینڈ کے کئی اہم بلے بازوں کو پویلین کی راہ دکھائی۔ دلچسپ بات یہ ہے کہ وہ ٹیسٹ کرکٹ میں جو روٹ کو گیارہ مرتبہ آؤٹ کر چکے ہیں — جو ایک ریکارڈ ہے۔
یاد رہے کہ جسپریت بمراہ گزشتہ چند برسوں سے انجریز کے باعث محدود ٹیسٹ میچز کھیل پائے ہیں، اور ان کی واپسی ہمیشہ ایک سوالیہ نشان رہی ہے۔ اب ان کا خاموش جشن ایک نیا سوال چھوڑ گیا ہے: کیا بمراہ کی ٹیسٹ کرکٹ میں گنتی کی جھلکیاں باقی رہ گئی ہیں؟ کرکٹ دنیا آنے والے دنوں میں ان کے فیصلے کی منتظر ہے۔
