راولپنڈی،بانی پی ٹی آئی سے ملاقات کا دن سیاسی رفقاء کے لیے ناکامی کا پیغام لایا، اڈیالہ جیل میں قید بانی پی ٹی آئی سے آج کسی بھی رہنما کو ملاقات کی اجازت نہ دی گئی۔ مختلف رہنما، جن میں اکرم عثمان، مریم کلثوم اکرم، ملک لیاقت علی خان اور تنویر اسلم شامل تھے، طویل انتظار کے باوجود بانی جماعت سے ملاقات نہ کر سکے۔
پی ٹی آئی رہنماؤں نے پبلک ٹرانسپورٹ کے ذریعے جیل کے گیٹ نمبر 5 تک رسائی حاصل کی، تاہم پولیس نے انہیں وہاں سے ہٹا کر فیکٹری ناکہ بھجوا دیا۔ اطلاعات کے مطابق تمام رہنماؤں کو پہلے ہی داہگل ناکہ پر روک لیا گیا تھا، جہاں سے وہ مختلف ذرائع سے گیٹ نمبر 5 تک پہنچے مگر وہاں بھی ناکامی کا سامنا کرنا پڑا۔
سیکیورٹی ذرائع کا کہنا ہے کہ ملاقاتوں پر پابندی انتظامی احکامات کے تحت لگائی گئی ہے، جس کا مقصد جیل سیکیورٹی اور داخلی پالیسی پر عملدرآمد کو یقینی بنانا ہے، رہنماؤں نے ملاقات نہ ہونے پر افسوس کا اظہار کیا اور اسے سیاسی انتقام قرار دیا۔
یاد رہے کہ اڈیالہ جیل میں قید بانی پی ٹی آئی سے ہر ہفتے مخصوص دن پر ملاقات کی اجازت دی جاتی ہے، تاہم گزشتہ کچھ ہفتوں سے ملاقاتوں پر مختلف وجوہات کی بنیاد پر پابندیاں لگائی جا رہی ہیں، جس سے پارٹی رہنماؤں میں بے چینی پائی جا رہی ہے۔
