سیئول، جنوبی کوریا کے مشہور کے پاپ گلوکار شم جے ہیون 23 برس کی عمر میں انتقال کر گئے، ان کی موت کے بعد یہ انکشاف ہوا کہ وہ خاموشی سے خون کے سرطان (لیوکیمیا) جیسے مہلک مرض سے لڑ رہے تھے۔ ان کے انتقال نے نہ صرف مداحوں کو غمزدہ کر دیا بلکہ کے پاپ کمیونٹی میں بھی سوگ کی فضا چھا گئی ہے۔
شم جے ہیون 7 اپریل 2002 کو جنوبی کوریا میں پیدا ہوئے اور کم عمری میں ہی موسیقی کے میدان میں قدم رکھا۔ وہ 2020 میں کے پاپ بوائے بینڈ **F. ABLE** کے رکن کی حیثیت سے منظر عام پر آئے۔ شم جے ہیون نہ صرف گروپ کے سب سے کم عمر رکن تھے بلکہ ان کی دلکش آواز، سادہ طبیعت اور مسکراہٹ نے انہیں لاکھوں مداحوں کا پسندیدہ بنا دیا تھا۔
گزشتہ چند برسوں میں **F. ABLE** کی سرگرمیاں محدود ہو گئی تھیں اور کئی ارکان نے علیحدگی اختیار کر لی تھی، جس کے بعد شم جے ہیون نے شوبز سے وقتی کنارہ کشی اختیار کی۔ ان کے مداح اس خاموشی کی وجہ نہیں جانتے تھے، لیکن اب انکشاف ہوا ہے کہ وہ خاموشی سے لیوکیمیا سے نبرد آزما تھے۔
ان کے قریبی دوست اور سابق گروپ ممبرلی ہو جوننے سوشل میڈیا پر افسوس کا اظہار کرتے ہوئے لکھاکہ ہم نے جو وقت ساتھ گزارا وہ ہمیشہ میرے دل میں رہے گا، میں دعا گو ہوں کہ تم اب ہر دکھ اور بیماری سے آزاد ہو۔
جنوبی کوریا میں شم جے ہیون کے انتقال پر کے پاپ فنکاروں اور فین کلبز کی جانب سے گہرے رنج و غم کا اظہار کیا جا رہا ہے۔ ان کی زندگی مختصر رہی، لیکن ان کی فنی صلاحیت، بیماری کے خلاف خاموش جدوجہد اور شائستہ رویہ انہیں مداحوں کے دلوں میں ہمیشہ زندہ رکھے گا۔
