گجرات ، ڈپٹی کمشنر نوید احمد کی ہدایت پر اسسٹنٹ کمشنر بلال زبیر نے شاہین چوک کا دورہ کیا جہاں انہوں نے صفائی اور شہر کی خوبصورتی سے متعلق جاری کاموں کا جائزہ لیا، دورے کے دوران نہ صرف صفائی کے انتظامات کو بہتر بنایا گیا بلکہ چوک کے اطراف پھیلائی گئی عارضی تجاوزات کے خلاف بھی انسداد انکروچمنٹ آپریشن کیا گیا۔
اس موقع پر غیر قانونی طور پر رکھی گئی اشیاء کو موقع پر ہٹا دیا گیا، جن میں فٹ پاتھوں اور سڑکوں پر رکھے گئے تھڑے، ریڑھیاں اور دیگر رکاوٹیں شامل تھیں، اسسٹنٹ کمشنر بلال زبیر نے عملے کو ہدایت کی کہ عوامی راستوں کو کسی صورت بند نہ ہونے دیا جائے اور شہریوں کی سہولت کو ترجیح دی جائے۔
انہوں نے یہ بھی واضح کیا کہ شہر کی خوبصورتی کو برقرار رکھنے کے لیے بلدیاتی ادارے مستقل بنیادوں پر ایسے آپریشن جاری رکھیں گے۔ شہریوں سے بھی اپیل کی گئی کہ وہ تجاوزات سے گریز کریں اور شہر کو صاف، خوبصورت اور قابل رہائش بنانے میں ضلعی انتظامیہ کا ساتھ دیں۔
یاد رہے کہ ضلعی انتظامیہ کی جانب سے گجرات شہر میں حالیہ دنوں میں مختلف مقامات پر انسداد تجاوزات مہم کے تحت کئی کارروائیاں عمل میں لائی گئی ہیں، جن کا مقصد عوامی مقامات کو اصل حالت میں بحال کرنا اور ٹریفک نظام کو بہتر بنانا ہے۔
