محکمہ اوقاف کی زمین واگزار کرانے کے لیے ایکشن پلان منظور، مساجد و مزارات کی تزئین کے لیے 3 ارب روپے مختص۔
محکمہ اوقاف نے صوبے بھر میں غیر قانونی قبضے سے 8102 ایکڑ قیمتی اراضی واگزار کرالی ہے، جس کے بعد محکمے نے اس مہم کو مؤثر بنانے کے لیے ایک نیا ایکشن پلان منظور کر لیا ہے۔ اس پلان کے تحت آئندہ مرحلے میں تمام سرکاری اداروں کے زیرِ تسلط اراضی کو بھی واگزار کرانے کے لیے ان کے سربراہان کو باضابطہ خطوط ارسال کیے جائیں گے۔
محکمہ اوقاف نے قبضہ مافیا کے خلاف قانونی چارہ جوئی کو مزید تیز کرنے اور زیر التواء مقدمات کو جلد نمٹانے کے لیے مکمل فالو اپ نظام نافذ کرنے کا فیصلہ بھی کیا ہے تاکہ کسی بھی مرحلے پر پیشرفت میں رکاوٹ نہ آئے۔
اسی سلسلے میں محکمہ اوقاف کے زیرِ انتظام مزارات اور مساجد کی تزئین و آرائش کے لیے 3 ارب روپے کا بجٹ مختص کیا گیا ہے۔ اس رقم سے نہ صرف تاریخی مقامات کی مرمت کی جائے گی بلکہ زائرین کے لیے سہولیات کو بھی بہتر بنایا جائے گا۔
محکمے نے تمام متعلقہ افسران کو ہدایات جاری کی ہیں کہ مزارات اور عبادت گاہوں کی سیکیورٹی کے لیے سی سی ٹی وی کیمروں کی تنصیب ہر صورت یقینی بنائی جائے تاکہ کسی بھی ناخوشگوار واقعے سے بچا جا سکے۔
یاد رہے کہ محکمہ اوقاف کے زیرِ انتظام ہزاروں مساجد اور مزارات ایسے تاریخی ورثے کی علامت ہیں، جو نہ صرف مذہبی لحاظ سے اہم ہیں بلکہ سماجی ہم آہنگی اور عوامی رابطے کا ذریعہ بھی بنتے ہیں۔ ماضی میں ان مقامات پر ناقص انتظامات اور زمینوں پر قبضوں کی شکایات عام تھیں، تاہم موجودہ انتظامیہ نے ان مسائل کے حل کے لیے کئی عملی اقدامات کیے ہیں۔
