وزیراعلیٰ خیبرپختونخوا علی امین گنڈاپور کی ہدایت پر دریائے سوات کے کنارے تجاوزات ہٹانے کے لیے آپریشن شروع، غیر قانونی مائننگ پر مکمل پابندی عائد، ذمہ داروں کے خلاف سخت کارروائی کا عندیہ۔
پشاور: وزیراعلیٰ خیبرپختونخوا علی امین گنڈاپور کی ہدایت پر دریائے سوات کے کنارے واقع تجاوزات کے خلاف سخت کارروائی کا آغاز کر دیا گیا ہے۔ ترجمان وزیراعلیٰ کے مطابق ضلعی انتظامیہ، پولیس اور متعلقہ اداروں پر مشتمل ایکشن ٹیم نے مشترکہ آپریشن شروع کیا ہے، جس میں کسی کو بھی رعایت دینے کا کوئی امکان نہیں رکھا گیا۔
ترجمان کا کہنا تھا کہ یہ کارروائی وزیراعلیٰ کی واضح ہدایت پر کی جا رہی ہے، جس میں دریائے سوات کے اطراف موجود غیر قانونی تعمیرات اور مائننگ سرگرمیوں کا مکمل خاتمہ کیا جائے گا۔ ان کا کہنا تھا کہ تجاوزات کے خلاف یہ آپریشن ترجیحی بنیادوں پر جلد مکمل کیا جائے گا تاکہ عوام کی جان و مال کا تحفظ یقینی بنایا جا سکے۔
دریائے سوات کے کنارے بیریئرز کی تعمیر کا بھی آغاز کر دیا گیا ہے، تاکہ ممکنہ خطرات سے شہریوں کو بچایا جا سکے۔ ترجمان نے واضح کیا کہ غیر قانونی مائننگ اب مکمل طور پر بند کی جا رہی ہے اور اس سلسلے میں جو بھی عناصر ملوث ہوں گے، ان کے خلاف سخت قانونی کارروائی کی جائے گی۔
یہ اقدام ایسے وقت میں اٹھایا گیا ہے جب صرف دو روز قبل دریائے سوات میں بے قابو لہروں نے 12 قیمتی جانیں نگل لیں، جس پر عوامی سطح پر شدید ردعمل سامنے آیا تھا۔ وزیراعلیٰ علی امین گنڈاپور نے واقعے کے فوراً بعد نہ صرف انکوائری کمیٹی قائم کی بلکہ دریائے سوات کے کنارے تمام تجاوزات کو 3 روز میں مکمل طور پر ہٹانے کا حکم بھی جاری کیا۔
وزیراعلیٰ کی زیر صدارت انکوائری کمیٹی کے اجلاس میں یہ فیصلہ بھی کیا گیا کہ دریا کے اطراف موجود تمام ہوٹلز کو مستقل بنیادوں پر رجسٹرڈ کیا جائے گا، تاکہ مستقبل میں کسی بھی ہنگامی صورتحال سے نمٹنے کے لیے ذمہ داریاں اور حفاظتی اقدامات واضح رہیں۔
یاد رہے کہ دریائے سوات کے کنارے ہر سال سیاحوں کی بڑی تعداد آتی ہے، اور غیر محفوظ تعمیرات اور مائننگ کے باعث قدرتی آفات اور حادثات کے خطرات میں اضافہ ہو جاتا ہے۔ حکومت کا حالیہ اقدام نہ صرف ماحولیاتی توازن کے تحفظ کی جانب ایک اہم قدم ہے بلکہ عوامی تحفظ اور نظم و ضبط کی بحالی کا بھی اشارہ دیتا ہے۔
