گجرات: پنجاب میں جدید ٹیکنالوجی اور ماحول دوست ٹرانسپورٹ کے فروغ کی جانب ایک بڑا قدم اٹھاتے ہوئے محکمہ صنعت و تجارت اور چین کی معروف کمپنی "سکائی ویل انرجی وہیکلز گروپ” کے درمیان اہم سرمایہ کاری معاہدہ طے پا گیا۔ معاہدہ صوبائی وزیر صنعت و تجارت چوہدری شافع حسین کی موجودگی میں مکمل ہوا۔
معاہدے کے تحت چینی سرمایہ کار گروپ پنجاب کے خصوصی اکنامک زون میں 75 ایکڑ رقبے پر ایک وسیع الیکٹرک وہیکلز اسمبلی پلانٹ قائم کرے گا، جو کہ صوبے میں اس شعبے کی پہلی بڑی سرمایہ کاری ہوگی۔ پلانٹ میں الیکٹرک بسیں، کاریں، ٹو وہیلرز، تھری وہیلرز اور دیگر جدید گاڑیاں تیار کی جائیں گی۔
چوہدری شافع حسین نے معاہدے کے موقع پر گفتگو کرتے ہوئے کہا کہ حکومتِ پنجاب چینی سرمایہ کاروں کے خیرمقدم کے ساتھ ساتھ انہیں ہر ممکن سہولیات فراہم کرے گی۔ ان کے مطابق، یہ منصوبہ نہ صرف صوبے میں روزگار کے مواقع پیدا کرے گا بلکہ پاکستان کو ٹیکنالوجی اور ماحول دوست معیشت کی طرف بھی گامزن کرے گا۔
انہوں نے مزید بتایا کہ وزیراعلیٰ پنجاب مریم نواز اس اہم منصوبے میں ذاتی دلچسپی لے رہی ہیں اور ہر ممکن اقدامات کر رہی ہیں تاکہ منصوبے کو جلد از جلد عملی شکل دی جا سکے۔
یاد رہے کہ پاکستان میں الیکٹرک وہیکلز کی مانگ میں مسلسل اضافہ ہو رہا ہے، اور حکومت کا وژن ہے کہ 2030 تک ملک میں بڑی تعداد میں ماحول دوست گاڑیوں کو متعارف کرایا جائے، تاکہ ایندھن کی بچت، آلودگی میں کمی، اور مقامی معیشت میں بہتری کو یقینی بنایا جا سکے۔
