چین کے شنگھائی ایئرپورٹ سے ایک دلچسپ اور حیران کن ویڈیو نے سوشل میڈیا پر لوگوں کی توجہ حاصل کر لی ہے، جس میں ایک خاتون کو سیکیورٹی عملے کی ہدایت پر اپنا میک اپ اتارتے ہوئے دیکھا جا سکتا ہے۔
یہ واقعہ اس وقت پیش آیا جب مذکورہ خاتون مکمل تیاری اور بھاری میک اپ کے ساتھ ایئرپورٹ پہنچی، تاہم چہرے کی شناخت کرنے والی مشین اس کی شناخت نہ کر سکی۔ ایئرپورٹ حکام نے جب تصویر اور چہرے کے درمیان عدم مطابقت محسوس کی تو انہوں نے خاتون سے اس قدر زیادہ میک اپ کرنے کی وجہ پوچھی۔
سیکیورٹی عملے نے خاتون سے قومی شناختی کارڈ طلب کیا اور ہدایت دی کہ جب تک چہرہ اصل شناخت سے مطابقت نہیں رکھتا، وہ اپنا میک اپ صاف کرتی رہیں۔
ویڈیو میں یہ بھی دکھایا گیا ہے کہ خاتون مرحلہ وار اپنا میک اپ ہٹاتی جا رہی ہیں۔
یہ ویڈیو دراصل گزشتہ برس کی ہے، لیکن حالیہ دنوں میں سوشل میڈیا پلیٹ فارمز پر گردش کرتے ہوئے وائرل ہو گئی ہے۔ صارفین کی جانب سے ویڈیو پر دلچسپ اور طنزیہ تبصرے کیے جا رہے ہیں، کچھ نے اس واقعے کو "میک اپ کی طاقت” کہا تو کچھ نے اسے جدید سیکیورٹی سسٹمز کی ناکامی قرار دیا۔
یہ واقعہ نہ صرف وائرل ہوا بلکہ لوگوں کو یہ بھی یاد دلا گیا کہ شناخت کے لیے اصل چہرہ دکھانا کیوں ضروری ہوتا ہے، چاہے وہ کتنا ہی خوبصورت کیوں نہ ہو۔
