لاہور،پاکستان تحریک انصاف کے رہنما سلمان اکرم راجہ نے کہا ہے کہ ان پر 20 مقدمات درج ہیں جن کی تفصیل خود انہیں بھی معلوم نہیں، نظام کو آئین و قانون کے دائرے میں رہ کر چلنے دیا جائے، عمران خان کو باہر آنا ہی ہے کیونکہ یہ عوام کی خواہش ہے۔
انسداد دہشت گردی عدالت کے باہر میڈیا سے گفتگو کرتے ہوئے سلمان اکرم راجہ نے کہا کہ ہم ایک ایسے نظام کے خلاف جدوجہد کر رہے ہیں جو جھوٹ کی بنیاد پر کھڑا ہے، صحافیوں کو اداروں سے نکالا جا رہا ہے، سڑکیں اسی لیے ہوتی ہیں کہ قوم آواز بلند کرے۔
ان کا کہنا تھا کہ ہمیں احتجاجی سیاست کرتے جلد دیکھیں گے، سڑکوں پر نکلنا ہمارا آئینی حق ہے، ہم کوئی بات چھپ کر نہیں کر رہے، پوری قوم نے قربانیاں دی ہیں، یہ جنگ صرف کسی ایک فرد نے نہیں لڑی، فوجیں میدان میں لڑتی ہیں، اور اس کا کریڈٹ بھی قوم کو جاتا ہے۔
انہوں نے کہا کہ موجودہ نظام کو ہوش کے ناخن لینے چاہئیں، عدلیہ اور میڈیا کو آزادی دی جائے، اور آئین کے مطابق تمام ادارے اپنی حدود میں رہ کر کام کریں۔
