اسلام آباد ہائیکورٹ نے پاکستان تحریک انصاف کے مرکزی سیکرٹری اطلاعات رؤف حسن کا نام ایگزٹ کنٹرول لسٹ (ای سی ایل) سے نکالنے کا حکم جاری کر دیا۔
عدالت نے قرار دیا کہ رؤف حسن کا نام ای سی ایل میں شامل کرنا غیر قانونی اور بدنیتی پر مبنی اقدام تھا۔
جسٹس انعام امین منہاس نے رؤف حسن کی درخواست کو منظور کرتے ہوئے انہیں بیرون ملک سفر کی مشروط اجازت دے دی اور ہدایت کی کہ وہ اس سلسلے میں متعلقہ ٹرائل کورٹ سے رجوع کریں۔
عدالت نے اپنے ریمارکس میں کہا کہ ٹرائل کورٹ قانون کے مطابق ان کی درخواست پر جلد فیصلہ کرے، وکیل نے مؤقف اختیار کیا کہ رؤف حسن کینسر سے صحت یاب ہونے والے مریض ہیں اور انہیں چیک اَپ کے لیے برطانیہ جانا ہے۔
عدالتی فیصلے میں مزید کہا گیا کہ درخواست گزار کے خلاف ایف آئی اے کا مقدمہ زیر سماعت ہے جس میں وہ ضمانت پر ہیں اور صرف مقدمہ درج ہونے کی بنیاد پر کسی شہری کا نام ای سی ایل میں شامل کرنا درست عمل نہیں۔
بعد ازاں اسلام آباد ہائی کورٹ نے رؤف حسن کا نام ای سی ایل سے نکالنے کا باضابطہ حکم صادر کر دیا۔
