لاہور، انسپکٹر جنرل پنجاب ڈاکٹر عثمان انور نے ملک کی موجودہ سرحدی کشیدگی کے تناظر میں صوبے بھر میں سیکیورٹی مزید سخت کرنے کی ہدایات جاری کر دی ہیں۔
اپنے بیان میں آئی جی پنجاب نے کہا کہ پنجاب پولیس ملک کے حالات کے پیش نظر مکمل الرٹ ہے، اور آپریشنل، اسٹریٹجک اور لاجسٹک تیاریوں کو مکمل کر لیا گیا ہے۔
انہوں نے واضح کیا کہ تمام ضلعی انتظامیہ، سول ڈیفنس، ریسکیو 1122 اور سیکیورٹی اداروں کے ساتھ قریبی رابطہ رکھا جا رہا ہے تاکہ کسی بھی ہنگامی صورتحال میں سیکیورٹی، امن و امان اور ریسکیو اقدامات مؤثر انداز میں کیے جا سکیں۔
آئی جی نے بتایا کہ بین الصوبائی سرحدی چوکیوں سمیت تمام حساس مقامات پر سیکیورٹی مزید سخت کر دی گئی ہے جبکہ ملک کی داخلی سرحدوں پر شرپسندوں اور دہشت گرد عناصر پر مسلسل نظر رکھی جا رہی ہے۔
ڈاکٹر عثمان انور نے مزید کہا کہ پنجاب پولیس افواج پاکستان کے ساتھ کھڑی ہے اور دشمن کے سامنے فولادی دیوار ثابت ہو گی، تمام آر پی اوز، ڈی پی اوز اور فارمیشنز کے سربراہان کو وار بک کے مطابق احکامات جاری کر دیے گئے ہیں۔
