گرینڈ ہیلتھ الائنس نے ملک میں ممکنہ ہنگامی صورتحال کے پیش نظر عزیز بھٹی شہید اسپتال سمیت دیگر سرکاری اسپتالوں میں جاری احتجاجی تحریک وقتی طور پر مؤخر کرنے کا اعلان کر دیا ہے۔
گجرات: گرینڈ ہیلتھ الائنس نے ملک میں ممکنہ ہنگامی صورتحال کے پیش نظر عزیز بھٹی شہید اسپتال سمیت دیگر سرکاری اسپتالوں میں جاری احتجاجی تحریک وقتی طور پر مؤخر کرنے کا اعلان کر دیا ہے۔ ڈاکٹرز نے کہا ہے کہ موجودہ حالات میں نجکاری کے خلاف احتجاج کو مؤخر کر کے وہ قوم کے ساتھ کھڑے ہونے کو اولین فریضہ سمجھتے ہیں۔
عزیز بھٹی شہید اسپتال میں ہائی الرٹ نافذ کر دیا گیا ہے، جہاں طبی عملہ کسی بھی ایمرجنسی سے نمٹنے کے لیے مکمل طور پر تیار ہے۔ اسپتال ذرائع کے مطابق ڈاکٹروں اور طبی عملے کی چھٹیاں منسوخ کر دی گئی ہیں اور ہنگامی بنیادوں پر سروسز کو فعال کر دیا گیا ہے۔
ڈاکٹرز کا کہنا ہے کہ اگر بھارت نے اپنی جارحیت جاری رکھی تو وہ محاذ پر پاک فوج کے ساتھ کھڑے ہونے سے بھی دریغ نہیں کریں گے۔ ان کا کہنا تھا کہ ملک کو اس وقت اتحاد و یکجہتی کی ضرورت ہے، اور بطور شہری اور طبی کارکن، وہ ہر اول دستے میں شامل رہیں گے۔
