گجرات: بھارتی حملے کے خلاف سیاسی جماعتوں کے قائدین نے شدید مذمت کرتے ہوئے اس اقدام کو بزدلانہ اور اشتعال انگیز قرار دیا ہے۔ مسلم لیگ ق کے صدر چوہدری شجاعت حسین نے بھارتی حملے کو ایک بزدلانہ کارروائی قرار دیتے ہوئے کہا کہ پاکستان کی سالمیت پر کوئی سمجھوتہ نہیں کیا جا سکتا۔
چوہدری سالک حسین اور شافع حسین نے بھی بھارت کو منہ توڑ جواب دینے کے عزم کا اظہار کرتے ہوئے کہا کہ قوم متحد ہے اور کسی بھی جارحیت کا ڈٹ کر مقابلہ کیا جائے گا۔
مسلم لیگ (ن) کے سینئر رہنما چوہدری عابد رضا کوٹلہ نے بھارتی اشتعال انگیزی اور بے گناہ پاکستانی شہریوں پر حملے کی شدید الفاظ میں مذمت کرتے ہوئے اسے بین الاقوامی قوانین کی کھلی خلاف ورزی قرار دیا۔
سابق وزیراعلیٰ پنجاب چوہدری پرویز الٰہی نے بھی بھارت کو بزدل دشمن قرار دیتے ہوئے کہا کہ دشمن کی ہر سازش کو ناکام بنایا جائے گا، قوم افواجِ پاکستان کے ساتھ کھڑی ہے۔
جماعت اسلامی گجرات کی جانب سے بھی بھارتی حملے میں انسانی جانوں کے ضیاع پر افسوس کا اظہار کیا گیا اور مطالبہ کیا گیا کہ عالمی برادری بھارتی جارحیت کا نوٹس لے۔
