9
گجرات / لالہ موسیٰ، ابتدائی اطلاعات کے مطابق معمولی رقم کے تنازع پر دوستی دشمنی میں بدل گئی، جس کے نتیجے میں محمد عمیر نامی نوجوان کو فائرنگ کرکے قتل کر دیا گیا۔
ذرائع کے مطابق مقتول کا بھائی رینٹ اے کار کا کام کرتا ہے، مقتول کا اپنے دوست سے 7 ہزار روپے کے لین دین پر جھگڑا ہوا تھا۔
اس تنازع کو ختم کرانے کے لیے محمد عمیر خود ملزم کے پاس گیا، لیکن ملزم پہلے سے اسلحے سے مسلح تھا۔
ملاقات کے دوران تلخ کلامی کے بعد ملزم نے فائرنگ کر دی، جس سے محمد عمیر موقع پر ہی جاں بحق ہوگیا۔
واقعے کے بعد مقتول کے لواحقین اور اہل علاقہ نے احتجاجاً جی ٹی روڈ بلاک کر دیا۔
مظاہرین کا مطالبہ تھا کہ قاتل کو فوری گرفتار کیا جائے۔ ایس پی تھانہ صدر لالہ موسیٰ کی جانب سے 12 گھنٹوں میں ملزم کو پکڑنے کی یقین دہانی پر احتجاج ختم کیا گیا۔
پولیس نے واقعے کی تحقیقات شروع کر دی ہیں، جبکہ ملزم کی گرفتاری کے لیے چھاپے مارے جا رہے ہیں۔
