لاہور، پاکستان تحریک انصاف کے سینئر رہنما اعظم خان سواتی نے کہا ہے کہ ملک کو موجودہ بحرانی کیفیت سے نکالنے کا واحد راستہ مذاکرات ہیں۔
انسداد دہشت گردی عدالت کے باہر میڈیا سے گفتگو کرتے ہوئے اعظم سواتی نے کہا کہ اگر ملک کو تباہی سے بچانا ہے تو اس کا حل صرف اور صرف بات چیت ہے۔
ان کا کہنا تھا کہ بانی تحریک انصاف کو مذاکرات پر آمادہ کر لیا گیا ہے، کیونکہ عمران خان اور پی ٹی آئی کی قیادت کو ملک کے مستقبل کی فکر ہے۔
اعظم سواتی کا مزید کہنا تھا کہ اس وقت پاکستان میں کوئی ایسا قائد نظر نہیں آتا جو ملک کو درست راہ پر ڈال سکے۔ ایک صحافی نے سوال کیا کہ "کیا کوئی برف پگھلی ہے؟” تو انہوں نے جواب دیا، "اللہ کرے، کیونکہ یہ ملک ہم سب کا مشترکہ ہے۔”
عبوری ضمانت میں توسیع
دریں اثنا، انسداد دہشت گردی عدالت نے جناح ہاؤس پر 9 مئی کو حملے اور جلاؤ گھیراؤ سے متعلق 5 مقدمات میں اعظم سواتی کی عبوری ضمانت میں”13 مئی“ تک توسیع کر دی ہے۔
عدالت کی سماعت ایڈمن جج منظر علی گل نے کی، تاہم پولیس جانب سے مقدمات کا مکمل ریکارڈ پیش نہ کیا جاسکا۔ پولیس کا مؤقف تھا کہ مقدمات کا ریکارڈ سپریم کورٹ میں موجود ہے کیونکہ ملزمان کی ضمانتیں وہاں زیر سماعت ہیں۔
یاد رہے کہ عدالت نے وکلاء سے عبوری ضمانتوں پر دلائل طلب کر رکھے ہیں۔
