اسلام آباد، نائب وزیراعظم اور وزیر خارجہ اسحاق ڈار کا کہنا ہے کہ پاکستان اقتصادی ترقی کے ایک نئے مرحلے میں داخل ہو رہا ہے، اور پائیدار معاشی استحکام کے لیے معدنی وسائل کا مؤثر استعمال ناگزیر ہے۔
اسلام آباد میں دو روزہ پاکستان منرلز انویسٹمنٹ فورم 2025 کا آغاز ہو گیا ہے، جس کا مقصد معدنی شعبے میں سرمایہ کاری کو فروغ دینا ہے، اس فورم میں امریکا، چین، سعودی عرب، روس، فن لینڈ اور ترکیہ سمیت مختلف ممالک کے وفود شریک ہیں۔
تقریب کے دوران غیر ملکی معزز مہمان پاکستانی بزنس کمیونٹی کے ساتھ ملاقاتیں کریں گے اور مختلف تجارتی امکانات پر مفاہمتی یادداشتوں (MoUs) پر دستخط کیے جائیں گے۔
وزیراعظم شہباز شریف اور چیف آف آرمی اسٹاف جنرل سید عاصم منیر بھی انویسٹمنٹ فورم میں شرکت کریں گے، جب کہ امریکی وفد کی قیادت ایرک مائر کر رہے ہیں۔
فورم سے خطاب کرتے ہوئے اسحاق ڈار نے کہا کہ پاکستان کے تمام معاشی اشاریے مثبت سمت میں جا رہے ہیں اور عالمی ادارے بھی ملکی معیشت میں بہتری کا اعتراف کر رہے ہیں، ان کا کہنا تھا کہ پاکستان معدنی وسائل، خاص طور پر سونا اور تانبہ، کے وافر ذخائر رکھتا ہے، جنہیں مؤثر طریقے سے استعمال کرنے کے لیے بڑے پیمانے پر سرمایہ کاری کی ضرورت ہے۔
انہوں نے کہا کہ ملک کی بڑی آبادی نوجوانوں پر مشتمل ہے، جسے انسانی وسائل کے طور پر استعمال کیا جاسکتا ہے، اور امید ظاہر کی کہ یہ فورم معدنی شعبے میں سرمایہ کاری کی راہیں ہموار کرے گا۔
وزیر تجارت جام کمال نے بھی خطاب کرتے ہوئے کہا کہ بلوچستان معدنیات سے مالا مال صوبہ ہے اور پاکستان میں اس شعبے میں سرمایہ کاری کے بے شمار مواقع موجود ہیں، جن سے فائدہ اٹھانے کے لیے جامع منصوبہ بندی اور سرمایہ کاری ضروری ہے۔
