لاہور، پنجاب میں نئے کار واش اسٹیشنز کے قیام پر پابندی عائد کر دی گئی ہے، محکمہ ماحولیات نے اس حوالے سے باضابطہ نوٹیفکیشن جاری کر دیا۔
نوٹیفکیشن کے مطابق، صوبے میں پانی کی کمی اور ممکنہ خشک سالی کے پیش نظر یہ اقدام اٹھایا گیا ہے۔ حکام کے مطابق ایک گاڑی دھونے کے دوران تقریباً 400 لیٹر پانی ضائع ہو جاتا ہے، جو موجودہ حالات میں تشویشناک ہے۔
محکمہ ماحولیات کا کہنا ہے کہ نئے سروس اسٹیشنز نہ صرف آبی وسائل پر مزید دباؤ ڈالیں گے بلکہ ماحولیاتی اور سماجی و اقتصادی چیلنجز کو بھی بڑھا سکتے ہیں۔
نوٹیفکیشن میں واضح کیا گیا ہے کہ پابندی کا اطلاق فوری طور پر ہوگا اور اس کی خلاف ورزی پر پاکستان پینل کوڈ کے تحت قانونی کارروائی عمل میں لائی جائے گی۔
دوسری جانب سرگودھا کے علاقے بچہ کلاں میں افسوسناک واقعہ پیش آیا، جہاں محکمہ صحت کے ایک کلرک پر مڈ وائف کے ساتھ زیادتی کا نشانہ بنانے اور ویڈیو بنا کر بلیک میل کرنے کا الزام عائد کیا گیا۔
پولیس رپورٹ کے مطابق آر ایچ سی بھابھڑا میں تعینات کلرک عبد القیوم نے مبینہ طور پر مذکورہ خاتون کے ساتھ نازیبا حرکات کیں اور اس کی ویڈیو بھی ریکارڈ کی۔
