40
بدین میں زمین کے تنازع پر دو گروپوں کے درمیان فائرنگ کے نتیجے میں دو سگے بھائیوں سمیت پانچ افراد جاں بحق ہو گئے۔
پولیس کے مطابق، سندھ کے ضلع بدین کے علاقے کھورواہ میں زمین کے تنازع پر دو گروپوں کے درمیان فائرنگ کا تبادلہ ہوا، جس میں دو بھائیوں سمیت پانچ افراد جان سے ہاتھ دھو بیٹھے۔
واقعے کی اطلاع ملتے ہی پولیس کی بھاری نفری موقع پر پہنچ گئی، جبکہ ریسکیو ٹیموں نے جاں بحق ہونے والے تمام افراد کی لاشیں سول اسپتال منتقل کر دیں۔
دوسری جانب لاہور ،برکی روڈ پر سی ٹی ڈی پولیس نے ایک کامیاب کارروائی کے دوران مبینہ مقابلے کے بعد ایک خودکش حملہ آور کو گرفتار کر لیا۔
ترجمان سی ٹی ڈی کے مطابق، خفیہ اطلاعات پر دو دہشتگردوں کی گرفتاری کے لیے برکی کے نواحی علاقے میں چھاپہ مارا گیا، جہاں ملزمان نے مزاحمت کرتے ہوئے فائرنگ شروع کر دی، جوابی کارروائی میں ایک خودکش حملہ آور کو گرفتار کر لیا گیا، جب کہ اس کا ساتھی زخمی حالت میں فرار ہونے میں کامیاب ہوگیا۔
