اسلام آباد:پاکستان نے مقامی سطح پر تیار کردہ اپنا پہلا الیکٹرو آپٹیکل سیٹلائٹ خلا میں بھیج دیا۔
پاکستان نے مقامی طور پر تیار کردہ پہلا الیکٹرو آپٹیکل سیٹلائٹ خلا میں بھیج دیا ہے۔ سپارکو (پاکستان کے قومی خلائی ادارے) کی جانب سے تیار کردہ سیٹلائٹ "ای او 1” کو چین کے جی چھوان سیٹلائٹ لانچ سینٹر سے خلا میں روانہ کیا گیا۔ اس موقع پر سپارکو کے سائنسدان چین کے لانچ سینٹر پر موجود تھے۔
مشن کا مقصد اور فوائد
ترجمان سپارکو کے مطابق یہ مشن پاکستان کے خلائی پروگرام کو مزید مستحکم کرے گا اور ٹیکنالوجی میں پیشرفت کا سبب بنے گا۔ سیٹلائٹ ای او 1 کو خاص طور پر قدرتی آفات کے ردعمل، زراعت، اور شہری منصوبہ بندی میں مدد کے لیے ڈیزائن کیا گیا ہے۔ یہ سیٹلائٹ خوراک کی حفاظت، پانی کے انتظام، اور قدرتی وسائل کی نگرانی میں اضافے کے حوالے سے اہم کردار ادا کرے گا۔
مستقبل میں استعمال
ای او 1 سیٹلائٹ کے ذریعے پاکستان کو قدرتی وسائل کی بہتر نگرانی، قدرتی آفات کی پیشنگوئی، اور زراعت کے شعبے میں مدد ملے گی، جس سے نہ صرف خوراک کی حفاظت کو یقینی بنایا جائے گا بلکہ پانی کے وسائل کا بہتر انتظام بھی ممکن ہوگا۔
