فیصل آباد، چلڈرن ہسپتال میں کروڑوں روپے کی کرپشن بے نقاب، میڈیکل سپرنٹنڈنٹ کا سٹاف آفیسر ٹھیکیداروں سے کروڑوں روپے لیکر رفوچکر ہوگیا۔
ذرائع کا کہنا ہے کہ ملزم عرفان کاہلوں نے ہسپتال میں سامان کی خریداری کیلئے سرمایہ کاری کے نام پر 2 کروڑ سے زائد رقم اکٹھی کی گئی، ٹھیکیداروں کو رقم کی واپسی پر 15 فیصد منافع کا لالچ دیا گیا، ملزم کی جانب سے ادائیگیوں کی مد میں ذاتی اکاؤنٹ کے بوگس چیک دیے گئے۔
ذرائع کے مطابق لین دین کے دوران ایم ایس آفس کا سرکاری نمبر، مہر بھی استعمال ہوتی رہی، فراڈ کرنے کے بعد ملزم نوکری چھوڑ کر بھاگ گیا اور تمام رابطے بھی منقطع کر دیئے۔
معاملے کی انکوائری کیلئے ایسوسی ایٹ پروفیسر کی سربراہی میں 3 رکنی کمیٹی تشکیل دے دی گئی۔
اس متعلق ایم ایس ڈاکٹر ثاقب منیر کی جانب سے یہ مؤقف اختیار کیا گیا ہے کہ ملزم نے ذاتی حیثیت میں ہسپتال کے نام پر رقم وصول کی، انکوائری کمیٹی متاثرہ افراد کے بیانات ریکارڈ کررہی ہے، ملزم کو معطل کرکے مختلف ذرائع سے تلاش کرنے کی کوشش کررہے ہیں۔
محکمہ صحت کی جانب سے ملزم عرفان احمد کاہلوں کو پیڈا ایکٹ کے تحت معطل کرنے کا نوٹیفکیشن جاری کردیا گیا۔
