عمان،عرب ممالک نے شام میں پُرامن انتقال اقتدار سے متعلق ہر ممکن مدد کی یقین دہانی کرادی۔
اردن میں شام کی صورتحال پر عرب لیگ کے 8 ممالک کے وزرائے خارجہ کا اجلاس ہوا ۔
اجلاس میں اردن، سعودی عرب، عراق، لبنان، مصر، متحدہ عرب امارات، بحرین اور قطر کے وزرائے خارجہ کی جانب سے شرکت کی گئی ، اجلاس کا مشترکہ اعلامیہ بھی جاری کردیا گیا۔
اعلامیے کے مطابق عرب ممالک کی جانب سے شام میں کسی قسم کے نسلی، فرقہ وارانہ یا مذہبی تفریق سے خبردار کیاگیا اور تمام شہریوں سے انصاف اور برابری کا مطالبہ کرتے ہوئے کہا کہ تمام سیاسی اور سماجی فورسز کو نئی شامی حکومت میں حصہ ملنا چاہیے۔
عرب ممالک کے اجلاس کے اعلامیہ کے مطابق شام میں سیاسی عمل کو اقوام متحدہ اور عرب لیگ کی جانب سے سلامتی کونسل کی قرارداد کے تحت تعاون کرنا چاہیے، 2015 میں منظور ہونے والی قرارداد میں مذاکرات کے تحت تصفیہ کے لیے ایک راستہ تشکیل دیا گیا ہے۔
اعلامیے میں یہ کہا گیا ہے کہ ریاستی ادارے شام کو افراتفری کا شکار ہونے سے بچائیں اور دہشت گردی کو ختم کرنے کے لیے مشترکہ کوششیں کریں کیونکہ اس سے شام، خطے اور دنیا کی سکیورٹی کو خطرات لاحق ہیں۔
عرب ممالک کے وزرائے خارجہ کے اجلاس میں اسرائیل کی شام کی سرحد پر حملوں کی مذمت کی اور شام کی حدود سے اسرائیلی فورسز کی دستبرداری کا مطالبہ کیا۔
