لاہور، وزیر اعلیٰ پنجاب مریم نواز کا کہنا ہے کہ صوبے کو محنت کشوں کی بہبود کے حوالے سے مثالی بنانے کا عزم رکھتے ہیں۔
محنت کشوں کی فلاح و ترقی کے لیے مشاورتی اجلاس منعقد ہوا، جس میں وزیر اعلیٰ پنجاب مریم نواز نے منصوبہ بندی طلب کرتے ہوئے اہم اسکیموں کی منظوری دے دی، اسی کے ساتھ پنجاب بھر میں لیبر کالونیاں قائم کرنے کے لیے بھی تجاویز طلب کر لی گئیں۔
اس موقع پر مریم نواز نے ہدایت دی کہ صوبے بھر میں مزدوروں کو کم از کم 37 ہزار روپے ماہانہ اجرت کی ادائیگی یقینی بنائی جائے اور سوشل سیکیورٹی اسپتالوں کو جدید سہولیات سے آراستہ کیا جائے۔
اجلاس میں یہ بھی فیصلہ کیا گیا کہ لاہور اور راولپنڈی اسلام آباد میں ابتدائی اسکریننگ کے لیے مریم نواز ویلنس سینٹر قائم کیے جائیں گے، جہاں مریضوں کو تشخیص کے بعد بڑے اسپتالوں میں ریفر کیا جائے گا۔
مزید برآں، لاہور ڈیفنس روڈ پر 200 بیڈز پر مشتمل "رحمت اللعالمین کارڈیالوجی سینٹر” بنانے کا اصولی فیصلہ کیا گیا، جبکہ رحیم یار خان میں 50 بیڈز پر مشتمل نیا سوشل سیکیورٹی اسپتال بنانے کی بھی منظوری دی گئی۔
وزیر اعلیٰ پنجاب نے مزدوروں کی فلاح کے لیے لیبر قوانین میں ترامیم کی ہدایت دیتے ہوئے کہا کہ صوبے کو محنت کشوں کے حقوق اور فلاح و بہبود کے حوالے سے ایک مثال بنائیں گے،مزدوروں کی اجرت، صحت کی سہولیات، بہتر روزگار اور رہائش کی فراہمی حکومت کی ذمہ داری ہے۔
مریم نواز نے اس عزم کا اظہار کیا کہ کوئی محنت کش بھوکا نہ سوئے، کسی کو تکلیف یا پریشانی نہ ہو، اور مزدوروں کے بچوں کو معیاری تعلیم کے بہترین مواقع فراہم کیے جائیں۔
