پشاور،گورنر خیبرپختونخوا فیصل کریم کنڈی کی جانب سے ارباب نیاز اسٹیڈیم کے نام کی تبدیلی پر صوبائی حکومت پر سخت تنقید کی گئی ہے۔
اپنے بیان میں گورنر خیبر پختونخوا فیصل کریم کنڈی کا کہنا ہے کہ ارباب نیاز اسٹیڈیم کے نام کی تبدیلی انتہائی نامناسب حرکت ہے، سٹیڈیم کا نام صوبے کو دہشت گردوں کے حوالے کرنے والے شخص کے نام پر رکھنا پختونوں کے زخموں پر نمک پاشی ہے۔
فیصل کریم کنڈی کا کہنا ہے کہ وزیر اعلیٰ اس صوبے کی شناخت مٹانے اور صوبے کو تباہ کرنے کے مشن پر گامزن ہے، سانحہ 9 مئی کے مرکزی کردار کے نام پر سٹیڈیم کا نام رکھنا ریاست دشمن قوتوں کو تقویت دینا ہے۔
گورنر نے کہا کہ ارباب نیازا سٹیڈیم کے نام کی تبدیلی کے خلاف پشاور کے غیور عوام کے شانہ بشانہ کھڑے ہیں۔
فیصل کریم کنڈی کا کہنا ہے کہ گزشتہ 9 سال سے اقتدار پر قابض جماعت ارباب نیاز اسٹیڈیم کی تزئین و آرائش اور بحالی تک نہ کر سکی، ایک جانب یہ نااہل حکومت ہے جبکہ دوسری جانب وفاقی حکومت اور پی سی بی نے لاہور اور کراچی کے اسٹیڈیمز کو چند ہفتوں میں مثالی بنایا۔
دوسری جانب پی ٹی آئی اور دیگر جماعتوں پر مشتمل اپوزیشن اتحاد تحریک تحفظ آئین پاکستان کے رہنماؤں کی جانب سےپیر پگارا سمیت جے ڈی اے قیادت سے ملاقات کی گئی۔
پی ٹی آئی اور اپوزیشن اتحاد کے رہنماؤں نے صوبائی دارلحکومت کراچی میں پیر پگارا صبغت اللّٰہ شاہ راشدی، جی ڈی اے رہنما صدر الدین شاہ راشدی سے ملاقات کی جس دوران اہم امور پر گفتگو کی گئی۔
