پشاور، خیبر پختونخوا کے طلبہ کے لئے وزیر اعلیٰ علی امین خان گنڈاپور کا اہم اقدام ، وزیر اعلیٰ کی جانب سے صوبہ بھر کے طلبہ کو مفت لیپ ٹاپ دینے کا اعلان کر دیا گیا۔
وزیراعلیٰ خیبرپختونخوا علی امین گنڈا پور کا کہنا ہے کہ پنجاب کے جتنے فیصد طلبہ کو لیپ ٹاپ دیئے جا رہے ہیں ، ہم بھی اتنے فیصد طلبہ کو مفت لیپ ٹاپ دیں گے۔
علی امین گنڈاپور کا کہنا ہے کہ وزیر اعلیٰ پنجاب، خیبر پختونخوا حکومت کے طرز پر اپنے شہریوں کو مفت صحت کارڈ دے ، ہم نے اپنی پوری آبادی کو صحت کارڈ پلس دیا ، اب لائف انشورنس کی سہولت دے رہے ہیں ، پنجاب حکومت بھی اپنی پوری آبادی کو یہ سہولیات دے۔
وزیراعلیٰ نے کہا کہ ہم نے مشکل حالات کے باوجود اپنی آمدن میں 55 فیصد اضافہ کیا ہے ، پنجاب بھی اپنی آمدن 12 فیصد سے 55 فیصد تک بڑھائے ، خیبر پختونخوا حکومت کے پاس خزانے میں 176 ارب روپے کا سرپلس پڑا ہے۔
علی امین گنڈا پور کا کہنا ہے کہ خیبر پختونخوا واحد صوبہ ہے جس نے آئی ایم ایف کا ٹارگٹ حاصل کیا ہے ، باقی کسی دوسرے صوبے نے نہیں کیا ، وزیر اعلیٰ پنجاب کو آئی ایم ایف کی طرف سے 300 ارب روپے سرپلس کا ہدف دیا گیا تھا ، پنجاب حکومت نے الٹا 146 ارب روپے کا خسارہ کیا۔
وزیراعلیٰ خیبرپختونخوا کا کہنا ہے کہ ہم 4 ہزار مستحق بچیوں کی شادیاں کروا رہے ہیں اور ہر بچی کو2 لاکھ روپے دے رہے ہیں ، چیلنج کرتا ہوں پنجاب کی کارکردگی ہماری 1 فیصد کارکردگی کے برابر بھی نہیں ، میں اس پر مناظرے کے لئے تیار ہوں۔
