لاہور، صوبائی وزیر اطلاعات عظمیٰ بخاری کا کہنا ہے کہ اگر سندھ اربوں کے فنڈ سے اپنی سڑکیں نہیں بنا سکتا تو پھر آپکا اللہ ہی حافظ ہے۔
سندھ حکومت کے ترجمانوں کے بیانات پر ردعمل دیتے ہوئے لیگی رہنما عظمیٰ بخاری نے کہا کہ پنجاب حکومت کے 90 فیصد منصوبے اپنے فنڈز سے مکمل ہو رہے ہیں، سیہون میں وزیراعلیٰ سندھ کے علاقے میں ہونے والے حادثے کو وفاق پر مت ڈالا جائے، پچھلے 16 سال سے سندھ پر پیپلز پارٹی کی حکومت ہے مسلم لیگ ن کی نہیں۔
عظمیٰ بخاری کا کہنا ہے کہ سندھ نے جو 956 ارب کا ترقیاتی بجٹ منظور کیا تھا اللہ کرے وہ جلد از جلد لگ جائے، مالی سال ختم ہونے والا ہے ابھی تک وزیراعلیٰ سندھ اپنے علاقے کی گلیاں، سڑکیں اور ہائی وے نہیں بنوا سکے۔
ن لیگی رہنما کا کہنا کہ ڈمپرز روزانہ کی بنیاد پر کراچی کے شہریوں کو اڑا رہے ہیں کیا وہ بھی وفاق کا مسئلہ ہے؟ وفاق سے ہر سال معمول کے مطابق سندھ کو ان کے حصے کے فنڈز ملتے ہیں، اگر سندھ ان اربوں روپے کے فنڈز سے بھی اپنی سڑکیں نہیں بناسکتا تو پھر آپکا اللہ ہی حافظ ہے۔
وفاق اور صوبوں کے معاملات میں چچا بھتیجی کے رشتے کا کیا تعلق اور اسکا حوالہ کیوں ؟ مریم نواز پنجاب میں اپنے صوبے کے وسائل سے درجنوں بڑی سڑکیں مکمل کرچکی ہیں، مراد علی شاہ واحد وزیراعلیٰ ہیں جن کو اپنے حلقے میں کام کروانے کے لیے بھی وفاق کی ضرورت پڑتی ہے۔
عظمیٰ بخاری کا کہنا ہے کہ وزیراعلی سندھ اپنے نئے ترجمانوں کو بریفنگ دیں، ان ناتجربہ کار ترجمانوں کو جو جھوٹی سچی پرچیاں دی جاتی ہیں یہ وہ وہی بول دیتے ہیں، جب کارکردگی اور کام بولتے ہوں تو ترجمانوں کا لاؤ لشکر رکھنے کی ضرورت نہیں پڑتی، کارکردگی اچھی ہوتو کام بولتا ہے جیسے مریم نواز کا کام بول رہا ہے۔
