نارنگ منڈی ، وفاقی وزیر صنعت وپیداوار رانا تنویر حسین کا کہنا ہے کہ پیکاایکٹ دراصل بانی پی ٹی آئی و سابق وزیراعظم کا قانون ہے صرف منظور ہمارے دور میں ہوا۔
پنجاب کے شہر نارنگ منڈی میں میڈیا سے گفتگو کے دوران رانا تنویر حسین نے کہا کہ میاں شہباز شریف دن رات محنت کررہے ہیں، وزیراعظم کی وجہ سے تمام وزرا کوبھی دن رات محنت کرنا پڑتی ہے، ہم رات12 بجے تک کام کرتے ہیں۔
رانا تنویر حسین نے کہا کہ الحمدللہ! ایک سال میں مسلم لیگ ن نے ملک کو معاشی طورپر مضبوط کیا، ہماری ایک سال کی کارکردگی سب کے سامنے ہے، پی ٹی آئی کی کوتاہیوں کا بوجھ مسلم لیگ( ن) کے سر پر ہے۔
وفاقی وزیرصنعت وپیداوار نے کہا کہ کھادوں کی قیمتوں میں استحکام آیا، کھاد کی نگرانی میں خود کر رہا ہوں، پہلی بار ہوا کہ کھاد کی قیمت بڑھی نہ بلیک ہوئی، ہم نے معاشی ترقی کیلئے1 سال میں بیرون ممالک کے ریکارڈ دورے کیے، دوروں کے مثبت اثرات مل رہے ہیں۔
رانا تنویرحسین کا کہنا ہے کہ وزیراعلیٰ مریم نواز نے پنجاب میں ہر طبقے کو ریلیف فراہم کیا، صوبے میں طلبہ، کسانوں، مزدوروں، مینارٹیز سمیت سب کو فائدہ ہوا۔
ن لیگی رہنما کا کہنا ہے کہ بانی پی ٹی آئی وسابق وزیراعظم نے ملک کو سری لنکا بنانے کی پوری کوشش کی، عمران خان کا مکمل ایجنڈا فتنے پر مشتمل ہے، پی ٹی آئی نے اداروں کو کمزور کیا۔
دوسری جانب وزیراعظم شہباز شریف متحدہ عرب امارات (یو اے ای) میں منعقدہ ورلڈگورنمنٹس سمٹ میں پاکستان کی نمائندگی کریں گے۔
ترجمان وزارت خارجہ کا بتانا ہے کہ وزیراعظم پاکستان شہباز شریف 10 فروری کو 2 روزہ دورے پریو اے ای جائیں گے، وزیراعظم شہباز شریف دبئی میں ورلڈگورنمنٹس سمٹ میں شرکت کریں گے، ان کیساتھ نائب وزیراعظم اور وزیرخارجہ اسحاق ڈار اور دیگر اعلیٰ حکام بھی ہوں گے۔
