لاڑکانہ،سابق وزیر خزانہ اور سیکرٹری جنرل عوام پاکستان پارٹی مفتاح اسماعیل کا کہنا ہے کہ حکومت عوام کے لیے رحمت کی بجائے زحمت بن چکی ہے۔
لاڑکانہ پریس کلب میں میڈیا سے گفتگو کے دوران مفتاح اسماعیل نے کہا کہ ملک میں 40 فیصد عوام غربت کی لکیر سے نیچے کی زندگی بسر کر رہے ہیں، 2کروڑ 65 لاکھ بچے سکولوں سے باہر ہیں، سندھ کو وفاق سے ملنے والے اربوں روپے کہاں جاتے ہیں؟
مفتاح اسماعیل نے کہا کہ پاکستانی عوام صابن، گھی اور دیگر اشیاء پر اپنی جیب سے 25 فیصد ٹیکس ادا کرتے ہیں، عوام کو حکومت سے کوئی فائدہ نہیں، حکومت عوام کے لیےرحمت کی بجائے زحمت بن چکی ہے، جب میں وزیر خزانہ تھا تو انکم ٹیکس 15 فیصد کیا جو اب بڑھ کر 49.50 ہو چکا ہے۔
سیکرٹری جنرل عوام پاکستان پارٹی نے کہا کہ پاکستان میں بجلی اور گیس سری لنکا، انڈونیشیا، ملائشیا، ساؤتھ افریقہ، کینیا، ایتھوپیا سے بھی مہنگی ہے، عمران خان نے اپنی حکومت میں نیب، نیب کھیل کر سیاست کی اور اپنے مخالفین کو جیلوں میں ڈالا۔
مفتاح اسماعیل کا کہنا ہے کہ بانی پی ٹی آئی و سابق وزیراعظم کو جو سزا ہوئی ہے وہ ٹھیک ہے، بشریٰ بی بی کو سزا دینا سمجھ سے بالاتر ہے ان کے پاس حکومتی عہدہ نہیں تھا، تحریک انصاف بیرونی ملک سے لابنگ اور دوسری طرف حکومت سے مذاکرات بھی کر رہی ہے۔
سیکرٹری جنرل عوام پاکستان پارٹی نے کہا کہ امريکا کا مثبت عمل دخل نہیں رہا، امريکا چاہے تو ہمیں آئی ایم ایف کے قرضوں سے نکلوا سکتا ہے، سندھ میں 18 سال سے پی پی، 13 سال سے پنجاب میں ن لیگ اور خیبر پختونخوا میں پی ٹی آئی کی حکومت ہے لیکن حکومتوں کو عوام کا کوئی اداراک نہیں۔