اسلام آباد ، وفاقی وزیر اطلاعات عطارتارڑ کا کہنا ہے کہ پوری دنیا نے تحریک انصاف کا اصل چہرہ دیکھ لیا،اب تم آؤٹ ہوچکے۔
اسلام آباد میں میڈیا سے گفتگو کے دوران وفاقی وزیر اطلاعا ت عطا تارڑ نے کہا کہ ہر جگہ سے اچھی خبریں آرہی ہیں، پچھلے سال مہنگائی 38فیصد تھی اب 3.9فیصد پر ہے،معیشت کی ترقی کے حوالے سے عالمی ادارے بھی بات کررہے ہیں۔
عطاتارڑ نے کہا کہ وزیراعظم پاکستان شہبازشریف نے ملک کو ترقی کی راہ پر ڈال دیا ہے، پاکستان پر بیرون ملک کے سرمایہ کاروں کا اعتماد بڑھ رہا ہے، آج معیشت گروتھ کی طرف جارہی ہے، پاکستان کی تاریخ کا سب سے بڑا ڈاکہ 190ملین پاؤنڈ کا تھا۔
وفاقی وزیر اطلاعات نے کہا کہ آج مجرم اور اس کے حواریوں کو سزا ہوئی ہے، این سی اے نے پیسہ پاکستان کو دیا ،انہوں نے جیبوں میں ڈال لیا۔
انہوںنے رشوت کے طور پر 5،5قیراط کی انگوٹھیاں لیں،اپنی کرپشن کو چھپانے کیلئے اب مذہب کا استعمال کررہے ہیں، ان کو شرم آنی چاہیے۔
وفاقی وزیر کا کہنا ہے کہ یہ اسلامی ٹچ ،مذہب کارڈ استعمال کرکے جھوٹے بولتے ہیں،یہ مذہب کے پیچھے چھپ کر بچنے کی ناکام کوشش کررہے ہیں، اب جو مرضی کارڈ لے آؤ، تم پر مہر لگ چکی، تم ایک سرٹیفائیڈ ڈاکو ہو، انہوں نے ملک میں تقسیم ڈالی،سیاست کو زہر آلود کیا۔