اسلام آباد ، وزیراعظم پاکستان شہباز شریف کی جانب سے وفاقی حکومت میں ای آفس پر عملدر آمد نہ ہونے پر سخت برہمی کا اظہار کیا گیا۔
وزیراعظم شہباز شریف کی بار بار ہدایت کے باوجود وفاقی وزارتوں اور ڈویژنز کی عدم دلچسپی کے باعث ای آفس کے احکامات پر تعمیل نہ ہوسکی۔
وزیراعظم پاکستان نے وفاقی حکومت میں ای آفس پر عملدرآمد نہ ہونے پر سخت برہمی کا اظہار کرتے ہوئے وزارتوں کے مابین خط و کتابت کے لیے ای آفس کے استعمال کو لازمی قرار دے دیا۔
وزیراعظم آفس کی جانب سے ای آفس کے نفاذ پر تمام وزارتوں، ڈویژنز کو ایک بار پھر مراسلہ ارسال کردیاگیا ، ای آفس کے استعمال پر زور دینے کے لیے مراسلے میں سخت ہدایات جاری کی گئی ہیں۔
مراسلہ میں بتایا گیا کہ تمام وزارتوں کے مابین خط و کتابت کو خصوصی طور پر ای آفس کے ذریعے یقینی بنایا جائے، مراسلہ میں فزیکل کمیونی کیشن کو مستر د کرکے ای آفس کے ذریعے خط و کتابت کو دوبارہ جمع کرانے کی ہدایت کی گئی ہے۔
وزیراعظم آفس کے جاری مراسلہ میں مزید کہا گیا کہ وزارت آئی ٹی اور این آئی ٹی بی ای آفس کے استعمال پر جامع رپورٹ تیار کرکے جمع کرائیں، رپورٹ میں وزارتوں میں ای آفس کی تعمیل سے متعلق تفصیلی اعدادوشمار شامل ہونے چاہئیں۔
