اسلام آباد ، حریت رہنما یاسین ملک کی زوجہ مشعال ملک کا کہنا ہے کہ اقوام متحدہ بتائے کشمیریوں کے حق خودارادیت بارے وعدوں کا کیا بنا۔
اپنے ویڈیو پیغام میں حریت رہنما کی اہلیہ مشعال ملک کا کہنا تھا کہ 1947 سے لیکر اب تک اقوام متحدہ میں کشمیریوں کے حق خودارادیت پر ایک درجن سے زائد قراردادیں ہیں، اقوام متحدہ سے پوچھنا چاہتی ہوں ان وعدوں اور قراردادوں کا کیا بنا، کیا دنیا کا قانون اندھا، بہرہ اور گونگا ہو چکا ہے۔
مشعال ملک نے کہا کہ کشمیری صرف اس لئے پیدا ہوئے ہیں کہ ہم اپنے شہداء کو دفناتے رہیں، کیا ہم جیلوں میں ہی پڑے رہیں؟ کیا ہم نے کالے قوانین کے تحت ہی زندگی گزارنی ہے۔
حریت رہنما کی زوجہ نے کہا کہ کیا اقوام متحدہ نے ہندوستان کی ہٹ دھرمی کے سامنے گھٹنے ٹیک دیئے ہیں، تاریخ کبھی اقوام متحدہ اور انسانی حقوق کی تنظیموں کو معاف نہیں کرے گی، کیونکہ کشمیریوں پر ظلم ہوتا رہا اور آپ خاموش ہے۔
مشعال ملک نے کہا کہ تاریخ اور دنیا گواہی دے گی کشمیریوں نے خون کے آخری قطرے تک جہاد جاری رکھا، انشاءاللہ فتح ہمارا مقدر ہے، افسوس دنیا دیکھتی رہی ،خاموش رہی اور کشمیری قربانی دیتے رہے۔
