پی ٹی آئی نے صوبے میں کرپشن کے فروغ کے سوا کچھ نہیں کیا ، عطاتارڑ

تازہ ترین خبروں اور تبصروں کیلئے ہمارا وٹس ایپ چینل جوائن کریں

 

latest urdu news

وفاقی وزیر اطلاعات و نشریات عطاتارڑ کا کہنا ہے کہ تحریک انصاف حکومت نے صوبے میں کرپشن کے فروغ کے سوا کچھ نہیں کیا۔

لاہور، وفاقی وزیر اطلاعات و نشریات عطاء اللہ تارڑ نے خیبرپختونخوا حکومت کی کارکردگی پر وائٹ پیپر جاری کرتے ہوئے کہا کہ خیبر پختونخوا میں عوامی مسائل حل کرنے پر کسی کی توجہ نہیں، تحریک انصاف حکومت نے صوبے میں کرپشن کے فروغ کے سوا کچھ نہیں کیا۔

لاہور میں پریس کانفرنس کے دوران وفاقی وزیر عطاء اللہ تارڑ نے کہا کہ وفاق میں مخلوط حکومت قائم ہے ، تمام سیاسی جماعتوں نے اپنے منشور پر الیکشن لڑا ، سیاسی جماعتیں نے اپنے منشور کے مطابق عوام سے کچھ وعدے کئے تھے۔

عطاتارڑ کا کہنا ہے کہ پنجاب میں مسلم لیگ (ن)، خیبر پختونخوا میں تحریک انصاف، سندھ اور بلوچستان میں پیپلز پارٹی کو پاکستان کے عوام نے مینڈیٹ دیا، سیاسی جماعتوں نے عوام کو باور کرایا کہ عوام کے مسائل کا حل ہمارے پاس ہے۔

ن لیگی رہنما کا کہنا تھا کہ خیبرپختونخوا میں تحریک انصاف حکومت کو 11 سال ہو چکے ہیں ، خیبرپختونخوا میں مالیاتی بدعنوانی اور بے ضابطگیوں میں اضافہ ہوا ، کے پی حکومت کو 152 ارب روپے کے مالیاتی خسارے کا سامنا ہے۔

خیبرپختونخوا میں سرکاری خزانے سے اربوں روپے سوشل میڈیا پر پروپیگنڈے کیلئے دیا جاتاہے،سوشل میڈیا کو ادائیگی فرضی کمپنیوں کے نام پر کی جاتی ہے، خیبر پختونخوا کا مجموعی خسارہ 725 ارب روپے ہے۔

وفاقی وزیر کا کہنا ہے کہ تحریک انصاف حکومت نے صوبے میں کرپشن کے فروغ کے سوا کچھ نہیں کیا، خیبرپختونخوا حکومت نے صوبے میں مہنگائی میں کمی کیلئے کوئی اقدامات نہیں اٹھائے، پہلے پنجاب بزدار کے ذریعے بدلہ لیا گیا اب کے پی میں علی امین گنڈاپور کے ذریعے بدلہ لیا جا رہا ہے، صوبائی حکومت صوبے کے عوام سے کس بات کا بدلہ لے رہی ہے؟۔

شیئر کریں:
frontpage hit counter