لاہور،دھند کی وجہ سے مختلف مقامات پر گاڑیاں ٹکرانے کے باعث 44 افراد زخمی ہوگئے۔
نجی ٹی وی چینل کے مطابق سرگودھا میں جہلم پل پر شدید دھند کی وجہ سے 5 گاڑیاں آپس میں ٹکرا گئیں جس میں 8 افراد زخمی ہوئے جبکہ 4 کی حالت تشویشناک ہے۔
ریسکیو حکام کا بتانا ہے کہ حادثہ شدید دھند میں بے احتیاطی کے باعث پیش آیا، ٹرک اور کار میں ٹکر کے بعد مزید 2 کاریں اور رکشہ بھی حادثے کا شکار ہوئے، حادثے کے4 زخمیوں کو ہسپتال منتقل کر دیا گیا ہے۔
علاوہ ازیں ڈی آئی خان میں بھکر روڈ پر بھی دھند کے باعث متعدد گاڑیاں آپس میں ٹکرا گئیں، حادثے میں 20 افراد زخمی ہوئے جبکہ 2 کی حالت تشویشناک ہے۔
ریسکیو حکام کے مطابق حادثہ شدید دھند میں بے احتیاطی کے باعث پیش آیا، زخمیوں کو ہسپتال منتقل کر دیا گیا۔
پولیس کے مطابق ایک اور حادثہ ڈیرہ اسماعیل خان میں بنوں روڈ صدرہ شریف کے مقام پر پیش آیا جہاں2 مسافر گاڑیاں ٹکرا گئیں، حادثے میں 12 افراد زخمی ہوئے، زخمیوں کو ڈی ایچ کیو ہسپتال منتقل کر دیا گیا ۔
