لاہور، وفاقی وزیر برائے منصوبہ بندی احسن اقبال کا کہنا تھا کہ ماحولیاتی مسائل سے نمٹنے کیلئے گرین انرجی کو فروغ دینا ہو گا۔
لاہور میں ایک تقریب سے خطاب کے دوران وفاقی وزیر احسن اقبال نے کہا کہ ملکی معیشت بہتری کی جانب گامزن ہے، حکومت توانائی کے شعبے کی ترقی پر کام کررہی ہے، ملک کو ماضی میں طویل لوڈشیڈنگ کا سامنا تھا، ہماری حکومت کی جانب سے سی پیک کے تحت توانائی کے منصوبے شروع کیے گئے۔
احسن اقبال کا کہنا تھا کہ ہم چاہتے ہیں سب کو سستی اورماحول دوست توانائی حاصل ہو، توانائی کی کمی پوری کرنے کیلئے مختلف اسکیموں پر کام کررہے ہیں ، متبادل توانائی کے منصوبوں پر بھی ورک کررہے ہیں، توانائی کے شعبے میں اصلاحات کا عمل تاحال جاری ہے۔
وزیر منصوبہ بندی نے کہا کہ توانائی کی ضروریات پوری کرنے کیلئے تاجکستان کیساتھ منصوبے پر کام کررہے ہیں، ایشیائی ممالک کو باہمی تعاون سےملکی ترقی کیلئے کام کرنا ہوگا، ایشیائی خطے کی ترقی کے لئے سب کا ساتھ چلنا انتہائی ضروری ہے۔
ن لیگی رہنما نے کہا کہ موسمیاتی تبدیلی بڑا ایشو ہے، 2022میں پاکستان کو سیلاب سے اربوں روپے کا نقصان ہوا، ایشیائی ممالک کو درپیش مسائل سے مل کر نمٹنا ہوگا۔
