شنگھائی تعاون تنظیم کے سربراہی اجلاس کا آج سے آغاز ہوگا، اجلاس میں شرکت کیلئے بھارت، چین، روس، ایران، تاجکستان اور کرغزستان کے وفود اسلام آباد پہنچ چکے ہیں۔
اسلام آباد میں آج سے شنگھائی تعاون تنظیم (ایس سی او) کا 23 واں سربراہی اجلاس شروع ہو رہا ہے، جس کی میزبانی پاکستان کر رہا ہے۔ اس اجلاس میں پاکستان سمیت 8 ممالک کے وزرائے اعظم شرکت کریں گے، جن میں پاکستان کے وزیراعظم شہباز شریف، چین کے وزیراعظم لی چیانگ، روس کے وزیراعظم میخائل مشوستن، بیلاروس کے وزیراعظم رومان گولوف چینکو، قازقستان کے وزیراعظم اولڑاس بیکتینوف، تاجکستان کے وزیراعظم کوہر رسول زادہ، اور ازبکستان کے وزیراعظم عبداللہ اریپوف شامل ہیں۔
کرغزستان کی کابینہ کے چیئرمین ڑاپاروف اکیل بیک، ایران کے اول نائب صدر محمد رضا عارف، اور بھارت کے وزیر خارجہ سبرامنیم جے شنکر بھی اس اجلاس میں شرکت کر رہے ہیں۔ منگولیا بطور مبصر اجلاس میں شامل ہے اور اس کی نمائندگی منگولیا کے وزیراعظم کر رہے ہیں، جبکہ ترکمانستان کے نائب چیئرمین راشد مریدوف بطور مہمان خصوصی شرکت کر رہے ہیں۔
دیگر معزز مہمانوں میں ایس سی او کے سکرٹری جنرل جانگ منگ، ڈائریکٹر ایگزیکٹو کمیٹی ایس سی او ریجنل اینٹی ٹیررسٹ اسٹرکچر رسلان مرزائیف، بورڈ آف ایس سی او بزنس کونسل کے چیئرمین عاطف اکرام شیخ، اور کونسل آف ایس سی او انٹربینک یونین کے چیئرمین مارات ییلی بائیف شامل ہیں۔
اس اجلاس میں معیشت، تجارت، ماحولیات، اور سماجی و ثقافتی روابط کے موضوعات پر بات چیت کی جائے گی۔ تنظیم کی کارکردگی کا جائزہ لیتے ہوئے، رکن ممالک باہمی تعاون کو مزید فروغ دینے اور تنظیم کے بجٹ کی منظوری جیسے اہم فیصلے بھی کریں گے۔ اجلاس کے بعد وزیراعظم شہباز شریف مہمانوں کے اعزاز میں عشائیے کا اہتمام کریں گے۔
