اسلام آباد، وفاقی وزیر داخلہ محسن نقوی نے چیئرمین پی ٹی آئی بیرسٹر گوہر کو سابق وزیراعظم عمران خان سے ملاقات کی یقین دہانی کرا دی۔
ذرائع کا کہنا ہے کہ وزیر داخلہ محسن نقوی کی جانب سے رات گئے بیرسٹر گوہر سے ٹیلیفونک رابطہ کیا گیا اور آج بانی پی ٹی آئی سے ملاقات کی یقین دہانی کرائی۔
محسن نقوی کی جانب سے صرف بیرسٹر گوہر علی کو انفرادی طور پر ملاقات کی یقین دہانی کرائی گئی ہے۔
ذرائع کا کہنا ہے کہ بیرسٹر گوہر نے عمران خان کے ذاتی معالج کی ملاقات کی درخواست کی گئی تھی، پی ٹی آئی نے سابق وزیراعظم سے ملاقات کیلئے وزارت داخلہ کو درخواست دی تھی۔
یاد رہے کہ پی ٹی آئی نے 15 اکتوبر کو ڈی چوک اسلام آباد میں احتجاج کی کال دے رکھی ہے، اسی روز ہی وفاقی دارالحکومت اسلام آباد میں شنگھائی تعاون تنظیم کا اجلاس شروع ہوگا جس میں مختلف ممالک کے سربراہان سمیت 200 وفود شرکت کریں گے۔
ادھر پی ٹی آئی کے ترجمان وقاص اکرم شیخ نے کہا کہ اگر حکومت ہماری بانی پی ٹی آئی سے ملاقات کروا دیتی ہے تو ہم 15 اکتوبر کے احتجاج کی کال واپس لے لیں گے۔
