سابق صدر اور رہنما پی ٹی آئی ڈاکٹر عارف علوی کا کلینک سیل کر دیا گیا۔
کراچی، سندھ بلڈنگ کنٹرول اتھارٹی (ایس بی سی اے) کی جانب سے سابق صدر ڈاکٹر عارف علوی کا کلینک سیل کر دیا گیا ہے۔
سندھ بلڈنگ کنٹرول اتھارٹی کی جانب سے گزشتہ روز سندھی مسلم کوآپریٹو ہاؤسنگ سوسائٹی بلاک بی میں کارروائی کرتے ہوئے رہائشی بنگلے میں قائم ڈینٹل کلینک کو سیل کر دیا گیا۔
ایس بی سی اے پولیس کی بھاری نفری کی جانب سے اس کاررروائی میں حصہ لیا گیا تھا اور اس متعلق ترجمان ایس بی سی اے کا کہنا تھا کہ کلینک رہائشی مکان میں ہونے پر سیل کیا گیا، یہ معمول کے مطابق کارروائی تھی، ایسی کارروائیاں ہوتی رہتی ہیں۔
علوی ڈینٹل کلینک کو سیل کرنے کے خلاف سابق صدر کی زوجہ ثمینہ علوی اور بیٹے اواب علوی کی جانب سے سندھ ہائیکورٹ میں درخواست دائر کر دی گئی ہے۔
درخواست کے مطابق ایس بی سی اے کی جانب سے سندھی مسلم سوسائٹی میں واقع ڈینٹل کلینک سیل کر دیا گیا، کلینک سیل کرنے کی وجہ محض سیاسی انتقام ہے، سابق صدر کو صرف سیاسی بنیادوں پر ہراساں کیا جا رہا ہے، ڈینٹل کلینک طویل عرصے سے قائم ہے، سیل کرنے سے پہلے کوئی نوٹس نہیں دیا گیا۔
سندھ ہائیکورٹ کی جانب سے ڈاکٹر عارف علوی کا ڈینٹل کلینک سیل کرنے کے خلاف درخواست منظور کرلی گئی ہے۔