لاہور ہائیکورٹ کا پریکٹس اینڈ پروسیجر آرڈیننس 2024 کیخلاف دونوں درخواستیں یکجا کر کے پیش کرنے کا حکم۔
چیف جسٹس لاہور ہائیکورٹ عالیہ نیلم نے پریکٹس اینڈ پروسیجر آرڈیننس 2024 کیخلاف منیر احمد ایڈووکیٹ کی درخواست پر سماعت کی۔ ایڈووکیٹ اظہر صدیق عدالت میں پیش نہ ہوئے۔
لاہور ہائیکورٹ نے پریکٹس اینڈ پروسیجر آرڈیننس 2024 کیخلاف دونوں درخواستیں یکجا کر کے پیش کرنے کا حکم دے دیا۔
عدالت نے دونوں درخواست گزاروں سے درخواستوں کے قابل سماعت ہونے سے متعلق بھی دلائل طلب کر لئے۔
دوران سماعت چیف جسٹس لاہور ہائیکورٹ کا کہنا تھا کہ دونوں درخواستوں میں ایک ہی طرح کے سوالات اٹھائے گئے ہیں لہذا دونوں درخواستوں کو یکجا کر کے پیش کیا جائے۔
لاہور ہائیکورٹ نے اٹارنی جنرل اور ایڈووکیٹ جنرل کو معاونت کیلئے 7 اکتوبر کو طلب کر لیا، درخواست گزار کی جانب سے موقف اختیار کیا گیا ہے کہ صدارتی آرڈیننس بدنیتی پر مبنی ہے۔
اس آرڈیننس کے ذریعے سپریم کورٹ کے اختیارات کو کم یا زیادہ نہیں کیا جاسکتا۔
عدالت صدارتی آرڈیننس کو کالعدم قرار دے اور پٹیشن کے حتمی فیصلے تک آرڈیننس پر عملدرآمد روکنے کا حکم جاری کرے۔
