سینئر رہنما پاکستان مسلم لیگ (ن) خواجہ سعد رفیق کا کہنا ہے کہ سیاسی جماعتوں نے کچھ بھی نہیں سیکھا، کوئی ہمیں دفن نہیں کر سکا نہ ہی ہم کسی کو دفن کر سکتے ہیں۔
لاہور میں سابق وزیراعلیٰ غلام حیدر وائیں کی برسی تقریب سے خطاب کے دوران سابق وزیر ریلوے خواجہ سعد رفیق کا کہنا تھا کہ غلطی چند لوگ کرتے ہیں، سزا ساری جماعت کو ملتی ہے، جو آج باری دے رہے ہیں، انہیں پہلے کہا گیا تھا کہ باری آپکی ہے۔
ن لیگی رہنما کا کہنا تھا کہ اسٹیبلشمنٹ سیاسی جماعتیں بناتی ہے، جس سے مشکلات پیدا ہوتی ہیں، سیاسی جماعتوں نے کچھ بھی نہیں سیکھا ہے، حتیٰ کہ اپنا منشور بھی پڑھ نہیں سکتیں۔
خواجہ سعد رفیق کا کہنا تھا کہ جو پارٹی آج رگڑا کھا رہی ہے یہ لوگ بھی اسی وجہ سے اس موڑ پر کھڑے ہیں۔
سابق وزیر پی آئی اے نے کہا کہ بلوچستان میں حالات تشویشناک ہیں، اپنی پارٹی سمیت تمام جماعتوں سے پوچھتا ہوں کہ بلوچستان میں کام کیوں نہیں کرتے؟ وہاں سے الیکٹیبلز کو لیا جاتا ہے، جو ضرورت پڑنے پر بھاگ جاتے ہیں، جمہوریت ریموٹ کنٹرول اور ارب پتی لوگوں کی وجہ سے نہیں چل سکتی۔
ن لیگی رہنما کا کہنا تھا کہ عدلیہ کے حالات بھی متنازع ہو گئے، غلطیاں سب نے کیں لیکن کوئی تسلیم کرنے کو تیار نہیں، کوئی بھی خود احتسابی کے عمل سے گزرنے کو تیار نہیں ہے۔
سعد رفیق کا کہنا تھا کہ نوجوان اندھی تقلید سے نکلیں قائدین کی عزت کریں لیکن شرک مت کریں۔
