پشاور، وزیراعظم کو خط لکھنے کی بات پر مشیر اطلاعات خیبرپختونخوا بیرسٹر محمد علی سیف کا کہنا تھا کہ گورنر کے پی وزیراعظم کو خط ضرور لکھیں مگر انہیں اپنی ذمہ داریوں کا احساس بھی دلائیں۔
فیصل کریم کنڈی کے بیان پر ردعمل دیتے ہوئے صوبائی مشیر اطلاعات بیرسٹر سیف کا کہنا تھا کہ گورنر پختونخوا، وفاقی حکومت کو امن و امان کے حوالے سے بیان بازی کے بجائےعملی اقدامات کی تلقین کریں۔
وفاق حکومت کو یہ بھی سمجھائیں کہ کراس بارڈر دہشت گردی روکنا بھی وفاقی حکومت کی ذمہ داری ہے۔
بیرسٹر سیف کا کہنا تھا کہ گورنر پختونخوا وزیراعظم پاکستان کو صوبے کے بقایا جات کے بارے میں بھی آگاہ کریں اور خط میں بجلی اور گیس کی لوڈ شیڈنگ کے مسائل سے متعلق بھی وزیراعظم پاکستان کو بھی آگاہ کریں۔
صوبائی مشیر اطلاعات کے پی نے کہا کہ گورنر فیصل کریم کنڈی شہباز شریف کو لکھیں کہ خیبرپختونخوا بھی پاکستان کا حصہ ہے اس لیے اس صوبے کیساتھ سوتیلوں جیسا سلوک نہ رکھیں۔
بیرسٹرسیف کی جانب سے فیصل کریم کنڈی کو تنقید کا نشانہ بناتے ہوئے یہ کہا گیا ہے کہ گورنر اپنی نوکری بچانے کے لیے چغلی کرنے والا نالائق بچہ بنے ہوئے ہیں۔