بنگلہ دیش کرکٹ ٹیم کے آل راؤنڈر شکیب الحسن کو حصص کی قیمت میں ہیرا پھیری کا الزام ثابت ہونے پر 50 لاکھ کا جرمانہ کر دیا گیا۔
بنگلہ دیش کرکٹ ٹیم کے معروف آل راؤنڈر شکیب الحسن کو حصص کی قیمت میں ہیرا پھیری کا الزام ثابت ہونے پر 50 لاکھ جرمانہ عائد کیا گیا ہے۔ بنگلہ دیش سیکیورٹیز اینڈ ایکسچینج کمیشن (بی ایس ای سی) نے شکیب الحسن کے علاوہ مزید چھ افراد اور کمپنیوں پر بھی اسی نوعیت کے الزامات کے تحت جرمانے عائد کیے ہیں۔
یہ کارروائی پیراماؤنٹ انشورنس کمپنی لمیٹڈ کے حصص کی قیمت میں ہیرا پھیری کے معاملے میں کی گئی، جس کی صدارت بی ایس ای سی کے صدر خندوکر رشید مقصود نے کی۔
شکیب الحسن کو ایک میٹنگ کے دوران ان الزامات میں قصور وار قرار دیا گیا۔ بی ایس ای سی کی جانب سے جاری کردہ پریس ریلیز میں واضح کیا گیا کہ یہ جرمانہ سیکیورٹیز ایکٹ کی خلاف ورزی پر عائد کیا گیا ہے۔
شکیب الحسن کی یہ مشکلات ان کے کرکٹ کیریئر پر منفی اثر ڈال سکتی ہیں، خاص طور پر جب وہ ہندوستان میں بنگلہ دیش کی قومی ٹیم کی نمائندگی کر رہے ہیں۔
یہ معاملہ بنگلہ دیش کے کرکٹ حلقوں میں ایک اہم بحث کا موضوع بن گیا ہے، اور شکیب کے مداح ان کی مستقبل کی کارکردگی کے بارے میں فکر مند ہیں۔
