کراچی، چیئرمین پیپلزپارٹی بلاول بھٹو زرداری کا کہنا ہے کہ آئینی عدالت ضروری اور مجبوری ہے اس لیے آئینی عدالت بنا کر رہیں گے۔
کراچی میں سندھ ہائیکورٹ بار سے خطاب کے دوران بلاول بھٹو کا کہنا تھا کہ آئین سازی اور قانون سازی عدلیہ کے ذریعے نہیں ہوسکتی، 19 ویں آئینی ترمیم سپریم کورٹ کی دھمکی کے باعث لانا پڑی مگر اب کچھ بھی ہو میثاق جمہوریت کے مطابق عدالتی اصلاحات لا کر رہیں گے۔
چیئرمین بلاول بھٹو زرداری کا کہنا تھا کہ 18 ویں ترمیم میں ججوں کے تقرر کا وہ طریقہ بدلنا پڑا جو پوری دنیا میں رائج ہے، امریکا میں پوری پارلیمان ججوں کے تقرر کا فیصلہ کرتی ہے، اسی لیے آج تک امریکہ میں مارشل لاء نہیں لگا ہے۔
بلاول بھٹو زرداری نے کہا کہ آئینی عدالت ضروری اور مجبوری بھی ہے، اسی لیے آئینی عدالت بنا کر رہیں گے تاکہ کسی دوسرے وزیر اعظم کو تختہ دار پر نا چڑھایا جا سکے اور لوگوں کو انصاف مل سکے۔
بلاول بھٹو زرداری کا کہنا تھا کہ ایک انصاف دینے والے ادارے نے عدالتی قتل کیا، ضیاء الحق کا دور شہید محترمہ بینظیر بھٹو نے دیکھا، اس دور میں سیاسی کارکنان پر تشدد ہوا، شہید بے نظیر کو پتہ تھا کہ ہمارا نظام ٹوٹا ہوا تھا، اس وقت افتخار چوہدری انقلابی نہیں پی سی او جج تھا، کوئی ڈیم والا جج نہیں تھا۔
چیئرمین پیپلزپارٹی کا کہنا تھا کہ اس وقت فیصلہ کیا تھا کہ آئینی عدالت بنی گے تو لوگوں کو انصاف ملے گا، اس وقت عدالتیں پکوڑوں اور ٹماٹر کی قیمتیں طے کر رہی ہیں۔
