90
پاکستان کرکٹ بورڈ نے پاکستان انگلینڈ ٹیسٹ سیریز کے نظرثانی شدہ شیڈول کا اعلان کر دیا۔
پی سی بی کی جانب سے جاری کردہ شیڈول کے مطابق دونوں ٹیموں کے درمیان پہلا اور تیسرا ٹیسٹ پہلے سے طے شدہ پروگرام کے مطابق ہوگا جبکہ دوسرا ٹیسٹ کراچی کے بجائے اب ملتان میں 15 سے 19 اکتوبر تک کھیلا جائے گا۔
پی سی بی کے اعلامیہ کے مطابق پہلا ٹیسٹ 7 سے 11 اکتوبر تک ملتان اور تیسرا ٹیسٹ 24 سے 28 اکتوبر تک راولپنڈی میں ہوگا۔
پی سی بی حکام کے مطابق دوسرے ٹیسٹ میچ کی کراچی سے ملتان منتقلی نیشنل بینک سٹیڈیم میں تعمیراتی کام کی وجہ سے ہوئی۔
ٹیسٹ سیریز کے شیڈول کے اعلان پر پی سی بی کے ڈائریکٹر انٹرنیشنل عثمان واہلہ کا کہنا ہے کہ پی سی بی انگلینڈ کی مینز کرکٹ ٹیم کے پاکستان دوبارہ آنے پر پرجوش ہے، ہم شائقین کی مدد کرنے اور دورے کو یاد گار بنانے کے لیے پرعزم ہیں۔
