وائس چیئرمین پی ٹی آئی شاہ محمود قریشی کا کہنا ہے کہ حکومت ہوش کے ناخن لے، حکومت آئین قانون اور عدالتی فیصلوں میں رکاروٹ بنی ہوئی ہے۔
لاہور کی انسداد دہشت گردی عدالت میں صحافیوں سے غیر رسمی گفتگو کے دوران وائس چیئرمین پی ٹی آئی شاہ محمود قریشی نے کہا کہ نوجوان کو مستقبل میں کچھ نظر نہیں آ رہا ہے، آئینی پیکج کی بات ہورہی ہے جو عدلیہ کے لیے سوالیہ نشان بن جائے گا۔
شاہ محمود قریشی کا کہنا تھا کہ عوامی نمائندوں کو اسمبلی سے اغوا کیا گیا، حکومت ہوش کے ناخن لے، اگر اپنی پالیسی پر نظر ثانی نہ کی گئی تو ملک بڑے حادثے سے دوچار ہوجائے گا۔
وائس چیئرمین پی ٹی آئی کا کہنا تھا کہ ہمارے 10 ایم این ایز کو قومی اسمبلی کے اندر سے اغوا کیا گیا جو قابل مذمت ہے، خورشید شاہ اور اسپیکر اسمبلی ایاز صادق نے تقدس ایوان کے حوالے سے جو گفتگو کی وہ قابل تحسین ہے۔
شاہ محمود قریشی کا کہنا تھا کہ اسپیکر کی جانب سے ہمارے ایم این ایز کے پرڈوکشن آڈر جاری کیے گئے اور وہ پیش ہو کر اپنے اغواء کا احوال بتائیں گے۔
سابقہ وزیر خارجہ کا مزید یہ کہنا تھا کہ کشمیر میں الیکشن ہونے جا رہے ہیں، کشمیری جب اس طرف دیکھتے ہیں وہ پاکستان سے مایوس ہوتے ہیں۔
