اسلام آباد، وفاقی وزیر داخلہ محسن نقوی کا کہنا تھا کہ پاکستان کو دہشت گرد گروہوں سے پاک کرنے کا وقت آگیا ہے۔
وزیر داخلہ محسن نقوی سے عوامی نیشنل پارٹی کے صدر سینیٹر ایمل ولی خان نے ملاقات کی جس میں باہمی امور اور ملکی صورتحال پر تبادلہ خیال کیا گیا، کے پی میں قیام امن کے لئے اقدامات پر بھی گفتگو ہوئی۔
اس موقع پروزیر داخلہ محسن نقوی کا یہ کہنا تھا کہ دہشت گردی ہر شکل میں قابل مذمت ہے، دہشت گردی کے خلاف قومی بیانیہ پاکستان کی آواز ہے، دہشت گردی سے نمٹنے کیلئے ہم سب کو ایک ہونا ہوگا۔
وفاقی وزیر داخلہ کا کہنا تھا کہ اے این پی نے دہشت گردی کا ڈٹ کر مقابلہ کیا، عوامی نیشنل پارٹی کے لوگوں نے دہشت گردی کے خلاف جنگ میں اپنی جانوں کو قربان کیا اور ہم انہیں خراج عقیدت پیش کرتے ہیں۔
محسن نقوی کا یہ کہنا تھا کہ آج سیاسی و گروہی تفریق سے بلند ہو کر پاکستان کو دہشتگرد گروہوں سے پاک کرنے کا وقت آگیا ہے، عوام کی حمایت سے دہشت گردوں کا صفایا کریں گے۔
ملاقات کے دوران صدر عوامی نیشنل پارٹی ایمل ولی خان نے انسداد دہشت گردی کے لئے اے این پی کی حمایت کا یقین دلاتے ہوئے کہا کہ دہشت گردوں نے معصوم لوگوں کو شہید کیا، اس جنگ میں آپ کے ساتھ ہیں۔
