اسلام آباد، رہنما پاکستان تحریک انصاف سینیٹر شبلی فراز نے نیب ترامیم بحالی کے فیصلے پر ردعمل دیتے ہوئے یہ کہا کہ آج کا فیصلہ این آر او ٹو تھا، مقدمہ عوام میں لے کر جائیں گے۔
رہنما پی ٹی آئی شبلی فراز کی جانب سے حکومت کو تنقید کا نشانہ بناتے ہوئے کہا گیا کہ یہ فارم 47 کے لوگ ہیں، یہ عوام کے حقیقی نمائندے نہیں، یہ ایسے قوانین بنائیں گے جن سے چوروں اور آئین شکنوں کو تحفظ ملے۔
شبلی فراز کا کہنا تھا کہ یہ حکومت جعلی طریقے سے بنائی گئی ہے، یہ لوگ عوام کے حق میں کیا قانون سازی کریں گے۔
رہنما پی ٹی آئی کا یہ کہنا تھا کہ اس ٹولے نے غریبوں کا خون چوس لیا ہے، ہم اس کو جعلی پارلیمنٹ سمجھتے ہیں، الیکشن میں پاکستان کی سب سے بڑی جماعت تحریک انصاف کو لیول پلیئنگ فیلڈ نہیں دی گئی، پی ٹی آئی سے انتخابی نشان بھی چھین لیا گیا، لوگوں نے پھر بھی تحریک انصاف کو ووٹ دیا، سب نے دیکھا الیکشن کے نتائج تبدیل کیے گئے۔
شبلی فراز کا کہنا تھا کہ این آر او ٹو اب دوبارہ رائج ہوچکا ہے، تحریک انصاف اپنی سیاسی جدوجہد جاری رکھے گی، 8 ستمبر کو تاریخ کا سب سے بڑا جلسہ ہوگا، اچھے ججز اپنی میعاد پوری کرکے عزت سے باہر جاتے ہیں، جس طرح کی قانون سازی آرہی ہے وہ ملک کے مستقبل کیلئے سود مند ثابت نہ ہوگی۔
رہنما پی ٹی آئی کا کہنا تھا کہ یہ تو لوٹ کر چلے جاتے ہیں، ایسے قوانین سے عوام کی زندگی کو اجیرن بنایا جاتا ہے، آج چور سینہ تان کر اور شریف سر جھکا کر پھر رہا ہے، لوگ ملک سے جارہے ہیں۔
