اسلام آباد، وفاقی وزیر اطلاعات و نشریات عطا تارڑ نے کہا کہ جدید ٹیکنالوجی کے استعمال کے بغیر ترقی ممکن نہیں، ڈیجیٹل میڈیا کے منفی استعمال سے کمزور طبقے کو ٹارگٹ کیا جاتا ہے۔
اسلام آباد میں ڈیجیٹل صحافت کی تقریب سے خطاب میں وفاقی وزیر اطلاعات و نشریات عطا تارڑ کا کہنا تھا کہ جدید ٹیکنالوجی کے استعمال کے بغیر ترقی ممکن نہیں ہوسکتی، ڈیجیٹل میڈیا سے کمزور طبقے کو ٹارگٹ کیا جاتا ہے۔
عطا تارڑ نے کہا کہ ہم نے فیکٹ چیک کا نظام متعارف کرایا ہے، وزارت اطلاعات فیکٹ چیک نظام سے لوگوں کو خبر درست یا غلط ہونے کا بتاتی ہے، جدید ٹیکنالوجی معلومات کی فراہمی میں اہم کردار ادا کرتی ہے۔
عطا تارڑ کا کہنا تھا کہ پاکستان میں پہلی مرتبہ ہم نے لینڈ ریونیو نظام کو مکمل طور پر ڈیجیٹلائز کیا، برطانوی راج کے وقت سے لینڈ ریونیو نظام رجسٹرز پر چل رہا تھا جوکہ ایک بہت بڑا چیلنج تھا۔
وفاقی وزیر اطلاعات و نشریات کا کہنا تھا کہ ہم نے پاکستان کا مؤثر ترین سیف سٹی پراجیکٹ لانچ کیا، جدید ٹیکنالوجی معلومات کی فراہمی میں بھی اہم کردار ادا کرتی ہے، جدید ٹیکنالوجی کی بدولت فری لانسنگ کا شعبہ بڑی اہمیت کا حامل ہے۔
عطا تارڑ کا کہنا تھا کہ سوشل میڈیا کے ذریعے جھوٹی خبریں پھیلائی جاتی ہیں، معاشرے میں انتشار پھیلانے کے لیے سوشل میڈیا کا استعمال کیا جاتا ہے۔
