راولپنڈی، سابق وزیراعظم عمران خان کی ہمشیرہ علیمہ خان کا کہنا ہے کہ سابق وزیراعظم عمران خان کا لیڈر شپ کو پیغام ہے 8 ستمبر کا جلسہ ہر صورت ہوگا۔
اڈیالہ جیل میں بانی پی ٹی آئی عمران خان سے ملاقات کے بعد میڈیا سے گفتگو کرتے ہوئے علیمہ خان نے کہا کہ سابق وزیراعظم عمران خان نے کہا ہے جلسہ انتشار کے خدشے کی وجہ سے مؤخر کیاگیا ہے، عمران خان نے کہا مجھے بتایا گیا کہ مذہبی جماعتیں اسلام آباد میں اکٹھی ہو رہی ہیں۔
علیمہ خان نے کہا کہ بانی پی ٹی آئی نے اعظم سواتی اور بیرسٹر گوہر کو بھی کہا ہے کہ 8 ستمبر والا جلسہ ملتوی نہیں ہوگا، 8 ستمبر کا جلسہ ہر صورت ہو گا، ورکرز کو ہدایات دی گئی ہیں کہ اگر اب جلسہ منسوخ کرنے کی اطلاع آئے تو آپ نے نہیں ماننا، مینڈیٹ چور حکومت کیخلاف اپنے گھروں سے ضرور نکلیں۔
عمران خان کی ہمشیرہ کا یہ کہنا تھا کہ کسی کو سمجھ نہیں آ رہی 7 بجے ملاقات کیسے ہوئی ہوگی، جیل میں اسٹیبلشمنٹ کے بغیر کچھ ممکن نہیں، صبح 7 بجے اڈیالہ جیل میں ملاقات ہونا ہمارے لئے بھی عجیب بات تھی۔
علیمہ خان کا یہ کہنا تھا کہ عمران خان کو اعظم سواتی نے مذہبی جماعتوں کے احتجاج کا بتایا، ان کو پہلے ہی پتہ تھا کہ دونوں چیزیں ممکن ہیں، آڈیو میری تھی، ہم بھی سب حیران ہوگئے تھے کہ جلسہ کیسے ملتوی ہوگیا ہے۔